【笑到最後】港交所300蚊的啟示 - 高明
港交所每隔三五年，總會搵到個概念去抽水，但股價炒咗上去，往往係無疾而終。 資料圖片
港交所（388）上周五重上300元，今浪吹起，叫「中概股」。
高明在2018年1月喺300蚊樓上高追過港交所，當年因為騰訊（700）同平保（2318）升咗成年
，港交所終於開車，心雄一齊買落去。結果？事後睇返，幾乎係港交所近年最高價追入。
港交所雖然畀人覺得一早染咗紅，但係以佢嘅概念同埋股價走勢，香港仔性格濃厚：埋堆、雷聲大、改頭換面再賣過。每隔三五年，總會畀港交所搵到個概念去抽水，最巨型嘅一次要數2007年資金自由行，只係吹咗兩句設境外證券證點，股價就炒咗上去，後尾資金自由行不存在而無疾而終。2015年再將同一件事再推過，改過個名做滬深港通，同一招又可以借A股牛市再炒上去，並且喺港股大時代時首次升穿300蚊。2017年就係慢牛加一堆科技分拆概念股上市。
今次就到吹中概股回歸，喺美國上市好哋哋，有大球場唔踢，點解要返香港踢街場？因為驚俾美帝制裁，所以先要返一個球場球證球員都係自己友嘅地方。事實上，如果要受制裁，喺香港上市一樣會受制裁，例如當年俄鋁（486）。中概股逃亡潮，叫做賺埋回港上市嗰筆，比起當年中國股民炒香港股票更加唔實在。
退一萬步，就當中概股隻隻好嘢，過去咁多次概念都未試過令港交所超越輪迴上落。例如2017年慢牛可炒騰訊（700）、平保（2318），人哋升咗成年，港交所實際喺2018年1月先正式開車，而且上升時間短。今次美團（3690）一眾股炒起，港交所亦要尾圍用膳。
港交所咁多年嘅重大概念，只要每一個完成吹水期嘅一半，𠵱家股價恐怕已過千蚊。可惜現實只係重上300蚊，有咁優秀嘅股價往績，呢啲錢睇嚟都係畀其他人賺。
筆者為證監持牌人，冇持有港交所。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://s.nextmedia.com