租金跌樓價升是否正常？
雖然大部分國家疫情已緩和，香港有幸躋身「受控圈」，可是各地處理疫情的標準不一，尤其美國、巴西的情況不斷惡化，相信地球村的經濟難以於一年內復甦，沒一個國家可以置身事外。疫情爆發期間，曾經股市跌、債券跌、油價跌，理論上樓市應該跌埋一份，香港樓價暫時未見好大鬱動，剛剛
才看到新聞話「十大屋苑半年破1500宗 6年最旺」，剛需盤想跌唔容易，極其量業主個心冇之前咁紅、口價冇咁硬，反而過二、三千萬貨仔，比較多筍嘢執下。
有個深圳朋友說最近公司裁了一半人，出街行商場又冇乜人，街舖執得就執，實體經濟進入寒冬期，無論舖位或者住宅的業主，大部分都主動減租留客，受疫情影響，明顯搵食艱難很多。但他奇怪樓價似乎不受影響，搶買豪宅的新聞日日都有，究竟是甚麼玩法？其實不止香港、內地，不少國家城市均出現租金跌但樓價不跌甚至反升的現象，情況雖然弔詭，值原因很簡單，因為全球央行都在放水。以美國為首的歐美國家都在量化寬鬆，內地這兩個月M2也重回兩位數，多次降準降息。據知不少美國人突然多咗積蓄，於是學人買股票，買Amazon、Tesla、Spotify之類，幫手撐起股價，同時亦有不少有實力的投資者會選擇買樓保值抗通賬，最後總有部分熱錢會流入全球的房產市場。最近因續領BNO成熱話，連隨英國樓都多人詢問，諗住投資又好、將來定居又好，總有個心態是早買有著數。如果你的目標是倫敦，可以密切觀察一下，但如果是曼徹斯特或者伯明翰，就不用太心急，根據Plumplot網站數據顯示，兩地現時樓價跟2004年差不多，睇定啲無妨。
HEA富專欄 - 郭釗 舊文
來源 source: http://www.am730.com.hk