笑到最後｜打氣文2.0︰大膽面對股價下跌（高明）
笑到最後｜打氣文2.0︰大膽面對股價下跌（高明）
今次嘅跌市喺一個理解上，係真跌。
高明喺10月13日發表文章「打氣文：大膽面對股價下跌」，當時納指為14537點，之後睇圖發現嗰日係成個升浪嘅第一日，之後29日反覆上升至16212點，
升11.15%，同期無數股評網民大嗌清倉現金為王之類，高明係少數叫人硬食跌幅等股價再上嘅作者。事後證明，好多股升返上去之後，已經喺另一境界，今次跌浪嘅痛，源於賺少咗，而唔係蝕入肉。近期因為鮑威爾逆主旋律亂講嘢而跌市，所以再寫多次「打氣文2.0︰大膽面對股價下跌」，再次為股市打氣，希望唔使照鏡，都可以催到票。
美股、外匯、加密貨幣免費即時報價，自選投資組合獲取相關新聞提示。
打氣還打氣，現實還現實。今次嘅跌市喺一個理解上，係真跌。過去好多次股價下跌，高明都形容為假跌，事關貨幣政策冇變、利息冇上升嘅情況下，股價上落一係隨機，二係人為。以前只有股市，股民死咗都唔知咩事。依家有真正新興市場：加密貨幣市場，操控相對較少，一睇就知過百年歷史嘅股市操控多，震上震落，做背後嘅任務。
12月初至今唔同嘅係，背後大莊家聯儲局真正開口講明縮減買大規模以及加息，實際情況要到今個星期聯儲局出聲明先知道，但係從之前口風睇都唔慌會太鴿。
因為要代入三姓主席鮑威爾（姓侵、姓拜、姓鮑），佢嘅訴求好簡單，就係開工，跟老細口風得嚟，件事唔好搞亂，前個星期嘅反彈，每次出一大棍陽燭，鮑威爾就衝出嚟講得更激，務求令股價下跌，結果係如願以償，升市係畀佢打窒咗，否則依家應該見到納指係16500點之類水平。高明將呢件事稱之為亂講，實際上鮑威爾就係做期望管理，首先自己輕輕一篤泡沫，費事真正公佈時一二千點咁跌，前期跌咁啲，唔使上曬身。
大家聽到呢度可能會話：咁你又叫我大膽面對股價下跌？
再代入三姓主席，成功由侵過底拜登，同古代一樣，降臣一定要比起家臣表面更加忠誠，家臣例如耶倫話加息，降臣要講完善加息機制之類，如果鮑威爾係清醒嘅，未必信自己口講出嚟嘅嘢，相信部份內容講大咗，做會收返細少少，只係講畀佢老細聽。唔好同我講鬼佬冇呢一套，咁清高嘅話，Trump用Twitter叫佢減息時一早遞信走咗啦。
儲局印鈔 冇得返轉頭
所以，另一層面就係鮑威爾樓上嘅勢力，就係奧巴馬班底。再講一次，現時嘅貨幣政策係重覆奧巴馬年代一次，口講加息強美元，實際貶值先係任務。奧巴馬任內期內雖然進行過3次QE量化寬鬆，但年年都出口術講利息正常化、就嚟加息、好鷹好鷹，實際數字，根據聖路易斯聯儲銀行數字，美元購買力相對消費物價指數下跌13%，如果用資產計跌幅更加恐怖，美股十年大牛市開端亦係由佢嚟，美國企業強係一回事，貨幣貶值推波助瀾。
同一個班底，就係會做一樣嘅事，最終都係貶貶貶，中間波動都係嚇人，一萬億基建張單，都係靠聯儲局印鈔借錢得來，唔見得有返轉頭嘅可能性。
睇完呢篇文，大家係咪知多咗點解股價下跌導致身家縮水呢？跌到慣，就唔會咁上心，然後可以靜待下一個機會來臨，而呢個機會，好快就嚟。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介：賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com