士佳說 - 張士佳 2022年2月4日
【#士佳說 】張士佳：港虎生威
【#士佳說 】張士佳：港虎生威
虎年第一個交易日先祝各位身體健康，投資如風虎雲龍，順勢時如虎添翼，逆市時仍能虎虎生威，越戰越強，出入有進。
回顧我牛年最後一篇文章言道，環球市場大前題美國加息收水，使美股大調整，中港兩地股市亦急升驟跌，但事至不懼，加上我估找數期到尾聲，日頭kk特弱將會扭轉，有幸言中了。
長線來講，我話底已近，再大幅下跌的風險較低，期指於牛年最後一個交易日在科技股ATM的帶動下，最多升過700點，企上23862，1月份仍陽燭收市。只要港股仍未破底，用望遠鏡睇市，慢慢做好，配合揀股之道及長遠目標，在虎年的投資便能成就優勢。
假前科技股反彈尤其是國內互聯網與旅遊板塊，要知道美團#3690都中曬兩瓣，既是疫情中受惠於外賣，又炒憧憬疫情完結，旅遊生意將再度增長，故ATM中美團看高一線，但就被騰訊有機會減持，抵銷上升動力，所以只係不過不失。
外圍方面，我哋春節假期間，納指巨頭科技股帶動反彈，美股連續升咗四日，但都似是超跌反彈，尋晚Facebook母公司Meta上季業績遜預期，令道指同納指都出現較深回吐。上篇講過短視頻TikTok打敗Facebook成美國Z世代最常用社交平台，搶了不少後生仔客源，估唔到FB生意都有今日，不過中概股又唔係跟回得好多，BABA仲有得升。
剛英倫銀行公布，將指標利率上調25點子至0.5厘，符預期。滙豐倫敦股價應聲抽升，值得留意匯豐#005今日開市表現，陽燭破頂都要追。同時亦留意中銀香港#2388、恆生#11等， 美國急加息預期相信銀行股強勢可持續。
跟進下假前提到的華潤置地#1109，獨立分拆上市的物業管理商，華潤萬象生活#1209逆市造好，累積升左5%，市場相信在內房債務危機下，國企內房連環收購，有利壯大住物管規模，值得不斷跟進持有。
全球高通脹刺激下，石油、資源股要望實，油價勢似要衝上每桶100美元。其實中石油#857、中海油#883 去年勁彈近六成又高息，若投資組合內仍持有，回報應該很不錯了，今年亦適宜細注長揸炒經濟復甦；另外，可以留意下以澳洲鐵礦石為重要收入來源的中信股份 #267，圖表上可以看到支持位一個高於一個，慢升地穩中帶勝。
另外港交所#388，假前在大跌後收第一支陽燭，低位有買只要不再破底，若再迎來第二支陽燭就用望遠鏡心態坐下等待。收市後李寧#2331發起的SPAC，Trinity Acquisition Holdings Limited，正式向港交所申請上市，相信之後仍有很多公司陸續申請為港交所帶來多個生意途徑。
講起體育用品，提一提我先前話體育用品至中最靚嘅361度，我講嗰陣時大家話唔係呀嘛，點知#1361假前一度升近30%，收$4.50升2成咁多。暫時消息不多，傳媒只係話近日361度疫情後，已通過加強品牌宣傳有效改善公司經營狀況和盈利能力，系國內領先運動服裝品牌，不妨跟進一下消息同股價。
春節長假，今日開市有匯豐同阿里撐住應該又唔會太差，不管今日紅盤高收還是低收，2月7日上證滬指復市，屆時藉兩會行情，都應該乘勢反彈。今年政策在全力穩金融增長，鬆地產、擴基建及資源產業鏈，為市場主軸，策略上離不開趁回調收集政策受惠股。
期指方面，若今日做陰燭，就更加要留意把握之後有靚仔陽燭收於周一高位23958點之上嘅機會。中央全力護航，不應低估政策的力度和決心，春節後不排除將有更多穩增長政策出台，應能為市場帶來虎進金來的動力。
士佳說 - 張士佳 舊文
本文作轉載及備份之用 來源 source: http://skycheung.weebly.com