笑到最後｜美股板塊逐塊洗版的啟示（高明）
笑到最後｜美股板塊逐塊洗版的啟示（高明）
有炒美股嘅人，多數都會睇熱力圖了解市場大致走勢，一眼望曬。
有炒美股嘅人，多數都會睇熱力圖了解市場大致走勢，一眼望曬。因為美股唔同企業齊章，睇熱力圖大致知資金走勢，當炒、失勢，初步有個了解。
事到如今，
不論係近期定遠期，美股都係一片紅，大部份嘅股份都經歷過唔同程度嘅洗倉，由待富股（前稱高增長股）、霸權股、軟件股、電動車股等科技股，到最新一浪零售股、傳統股，所到之處，未致於寸草不生，但係條草少一半係起碼，冇九成都唔罕見。暫時未被洗版，只剩下大型醫藥股及石油股。
洗版原因，多個月嚟不斷演變，由最初升太多估值高，到憂慮加息，之後加息加劇，繼而到企業調低全年目標、收入增長放緩等，以及最新嘅憂慮衰退。因為跌緊，一沉百踩，講任何壞消息都輕易有反應。
槓桿孖展太多
咁多原因之中，有真跌有假跌，加息一定係最直接影響全部股價，而企業表現亦都主導股價有冇持續高增長實力。至於憂慮乜乜物物，未發生嘅事驚定先，即係假跌。
廣泛咁洗版，或者被稱為割韭菜，現實有佢嘅目的，最終都係要清除孖展或槓桿倉。經歷啱啱過去嘅2022年加密貨幣金融風暴後，只要有缺口，資金就會湧入修正，美股市場大更多，槓桿及孖展超容易得到，其實深受愛戴嘅三倍納指槓桿（TQQQ）太多人買，天秤聚埋同一邊，樹倒猢猻散現象。
咁樣嘅衝擊再一次教大家，買股貪快就會被懲戒。
至於我企邊邊？股神畢菲特係咁買貨，網上覺得畢菲特係廢老嘅人睇淡，開始月供三倍睇淡納指（SQQQ），正常人都知邊邊笑到最後啦！
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com