操盤手劄記│哪些科網股 有望綠燈照（割柑人）
操盤手劄記│哪些科網股 有望綠燈照（割柑人）
光大證券預計，內地會有一批綠燈科技受惠國策，當中包括騰訊。
上周係多事之周！美國聯儲局主席鮑威爾喺議息後嘅記者會上話：「唔相信正在衰退」，翌日就被GDP數據兜巴摑面，美國第二季GDP收縮0.9
%，加上第一季GDP收縮1.6%，連續兩季收縮，已符合衰退嘅技術性定義。再翌日，儲局睇重嘅通脹指標——剔除食品同能源價格後嘅核心個人消費支出（Core PCE）出爐，6月按年升4.8%，高過預期。市場正在疑惑，經濟下行風險同通脹風險，儲局點秤？
美股、外匯、加密貨幣免費即時報價，自選投資組合獲取相關新聞提示。
當然，美國對衰退嘅官方定義，唔係市場慣用嘅技術性定義，而係由美國國家經濟研究局（NBER）轄下景氣周期測定委員會（BCDC）去判定；不過，當NBER宣告衰退始末時，已經事過境遷。美國上次衰退係2020年疫情高峯期，NBER喺6月宣告2月已陷入衰退，再喺7月宣告4月已結束衰退；換言之，衰退未宣告已結束。Bear in mind，呢個係專家判斷，唔係公式；兼係滯後性，唔係實時性。
美國衰退真亦假
現時無論白宮、華爾街，以至多數經濟分析員，都否認美國已陷入衰退，理由係就業市場持續強勁，6月失業率3.6%，接近2020年疫情爆發前嘅3.5%；第二季僱員成本經季節性調整後升1.3%，逼近第一季嘅1.4%紀綠高位；佔美國經濟超過三分之二嘅消費，經通脹調整後嘅消費者支出，由5月減少0.3%改善至6月增加0.1%，可見勞動市場並未轉差，薪酬仍有增加，民眾仍有錢花，唔似衰退。
連日多個數據反映通脹居高不下，市場擔心儲局不惜犧牲經濟增長以遏制通脹，衰退只係遲早問題。逆向思維再次發揮作用，市場炒衰退訊號可能令儲局忍手加息，美股連日不跌反升，上周五道指、標指、納指分別升1%、1.4%、1.9%，都已連升3日；美國10年期債息跌至2.65厘，則已連跌3日。然而，通脹並未見頂，預言美息最快明年首季掉頭回落，相信只係大戶趁機挾淡嘅藉口。
港股二萬關勢危
美股向上，港股則向下，夜期低水125點，ADR比例指數低水141點，險守二萬關。阿里巴巴ADS（BABA）跌11.1%，收89.37美元，以1份ADS換8股計，折算港股87.7港元，較本港收市低5.8%，事緣該公司終被美國證監會納入預計除牌名單。港股受中外監管、地緣政治等因素困擾，加上美國上周加息後，本港走資持續，後市偏淡。走勢上，恒指跌穿三角形，料將下試5月下旬低位19890，以至5月上旬低位19178。
上周四晚，國家主席習近平同美國總統拜登通電話，未提削減關稅，市場憧憬落空。當日較早時，習近平主持中共中央政治局會議，除咗提到保交樓，穩民生，仲對平台經濟監管作出指引，指要「集中推出一批『綠燈』投資案例」。綠燈照向邊度？光大證券預計照向四個領域：①促進實體經濟，如快遞、外賣；②促進產業升級，如幫助中小企業數碼轉型；③科技創新；④國際化。該行睇好騰訊（700），指其金融科技、企業服務穩步發展；亦睇好網易（9999），指其具備創新業務；又睇好百度（9888）嘅人工智能（AI）、智能雲、自動駕駛業務。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com