【平民投資教室】錢俊：唔想再面對供股可以點
平民投資教室
日期：2023-02-21
更新時間：08:56:24
領展供股消息震撼市場。無他，太多香港散戶有貨，因為公司中曬一般投資者最愛嘅元素—藍籌股、房地產、穩定派息。更多退休一族，萬不想到依家或要檯錢。無論如何，過埋後
日就要決定要唔要供股權。供定唔供，各有理據。公司層面以外，喺長線投資考慮，錢俊或者有一另類睇法。
近期另一震撼消息係有線寬頻決定交還收費電視牌照，標誌一個時代嘅終結。以前觀眾最想娛樂有得揀，俾錢有得睇多幾個台，揀自己鍾意嘅節目，仲有得睇波，有線就喺當中殺出重圍，啟播六年後更加喺1999年於香港及美國同步上埋市，當時招股價為10.39港元，市值達209億。
好景不常，互聯網爆發，大眾除咗有更多娛樂，仲有video on demand嘅串流平台出現，傳統付費電視式微，有線股價到今日已經淪為仙股，相對招股價跌幅超過99%。
好多投資者成日以為股票只要一日未放，總會返家鄉。然而有線又係一個反面例子。事實係投資需要不時審視，保持理性，懂得放手。更好長遠做法，係分散投資，買大市嘅市場指數係其中一個方法。因為指數能夠做到汰弱留強。表現好嘅股票，慢慢會佔更多嘅權重，而表現不佳嘅，就會被減磅，甚至被剔出指數以外。
做人最想有得揀，供與唔供以外，其實仲可以考慮換貨，市場有更大嘅森林俾你揀。若換返隻ETF，能夠自動又有紀律地修正投資組合，而且以後唔會有人再叫你供股。
03189：首隻中國離岸白酒ETF
講起傳統產業，上周國內基金公司易方達推出中證白酒指數ETF（03189），為中國大陸以外及香港第一隻相關行業嘅ETF。基金跟蹤中證白酒指數，投資滬深股市與白酒企業相關嘅公司。以現價計一手只係兩百幾蚊，管理費為0.80%。基金成份包括國內A股五糧液、貴州茅臺、瀘州老窖等。
所謂白酒，即係中國烈酒。受惠國內大眾富戶及中產急速冒起，對烈酒自用、送禮、應酬需求大。過去十年計，滬深300指數的每年平均回報為4.5%，但中證白酒指數則為17%，明顯領導大市升幅。同時亦造就多隻股王，包括滬深300指數入面權重最高嘅貴州茅台，以及排名第五嘅五糧液。
投資價值方面，此ETF投資範圍只覆蓋單一產業，專注度極高，錢俊認為投資者或需要對呢個行業有深切認識，方能認準投資時機。單一產業亦令投資容易受國策影響，比如之前政府打貪及支持減少送禮嘅風氣，曾令行業急插水。以龍頭股貴州茅台為例，現價與2021年高位比較，仍跌約24%。當然，與一眾科技股相比，或者過去兩年已經唔算輸得好慘烈。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com