金手指 - 孫柏文 2012年6月19日
金手指：德國同世銀斬纜 - 孫柏文
禮拜日希臘大選完畢後，亞洲區噚日開市後就飆升。無它，一向自認通識，有大國崛起咁勁嘅股民，睇完選舉後議席分佈，就同自己話一切照舊，唔會反歐盟、唔會棄歐元，又可炒上。
點知，喺亞洲區股市收市後冇耐，西班牙10年期債息升穿7厘，即係。最恐怖嘅地方，就係兩年後還嘅債，都由3月初嘅兩厘，去到噚日升穿5厘。一切照舊，即係又番去冇嘢work嘅世界。
噚日咁升，基本上係送個拋空機會俾大家，因為一切照舊status quo嘅最大問題，係之前歐央行懶有矜持唔印，依家都唔印。西班牙同希臘啲銀行照擠提，當錢滙到德國時，因西班牙同希臘啲銀行冇現金，所以就由德央行出住俾啲德國銀行先，西班牙同希臘嘅央行幫自己啲銀行包底，央行與央行之間就有拖冇欠咁劄數。
咁西班牙同希臘央行啲錢點來？好問題，因為呢個都係德國人今日問緊嘅問題，原來央行與央行之間，一旦冇錢還時，係冇點解決嘅機制。所以，呢啲歐豬國家先至咁口響，例如西班牙可以大大聲話：「唔減財赤，吹咩？」
法國債息隨時扯上
呢啲找唔到數嘅銀行，已經令歐豬央行欠德央行嘅數，接近萬億元，亦以每日幾十億元咁增加。除非德央行斬斷同歐豬央行嘅關係(亦即將嗰啲國家嘅銀行系統，同世界銀行系統斬纜)，德國就不斷增加數學上對方好快會變壞賬嘅數。
市場噚日可以喺「理想」嘅希臘選舉結果下，都將西班牙債息狠狠地踢上，等於歐盟已經冇嘢可以做。好快會火燒法國，法國債息扯上，甚至德國都會被波及。
呢場金融海嘯，喺雷曼爆嗰刻，就係end of the beginning，西班牙噚日嘅債息走勢，就應該係beginning of the end。
孫柏文
作者為獨立股評人
本欄逢周二、四刊出
上一則: 青心直說：收購睇PE太Naive - 胡孟青
下一則: 投資的天空：市場轉向觀望領導人行動 - 張士佳
~TITLE_S~金手指 - 孫柏文 2012年6月19日 舊文