金融High Tea 2012年6月19日
金融High Tea——打完大交身子弱
2012年6月19日
■根據中原地產資料顯示，北京6月新建住宅簽約，一手成交量首次回復「正常」，二手房住宅簽約同比上漲21%，成交量再現明顯上漲。新華社
希臘國會重選大步檻過，由支持緊縮的新民主黨勝出，希臘脫歐憂慮得以緩解，區內股市齊齊反彈，不過升幅唔係咁大。內地股市最無反應，上證綜指微升0.4%至2316點。港股朝早係威係勢，恒指高開344點，上破19500點，但已經係全日最高，之後逐步回順，收市升194點，收報19428點，成交唔夠480億元。
散戶連續兩日俾玩，上周睇淡被夾死，昨日見希臘大選出好消息仆入去造好，結果又中招。港股昨日咁走勢，固然有炒作因素，亦有基本因素。先炒作因素，你唔可以只睇昨日升幅，要將上周五升幅夾埋一齊睇，你當大戶夾散戶也好，當港股偷步炒也好，上周五大升425點，加埋昨日升的194點，兩日加埋升咗619點，已經唔係少。或者你會覺得調轉嚟上星期五升194點，昨日升425點，你會接受好多，但無論如何，上周五的大升市已透支了升勢。
偷步上升畀番你
當然更加不能排除，大戶在上周五人人唔睇好時偷步炒上，先夾死淡友，到昨日人人覺得無事時，佢派貨畀埋你沽突，順手殺埋好友。
從基本因素看，雖然暫時清除了希臘脫歐的風險，但歐債危機仍然嚴峻，西班牙債息在歐羅區同意貸款救該國銀行後，不跌反升，10年期國債上破7厘高峰，未知希臘解困可否拉低問題國家債息。市場仍然觀望20國(G20)峰會的動向，G20原本計劃好萬一希臘出事，會聯手救市，現在已無大開水閘救市必要， G20未必有動力出手。美國聯儲局跟手又開會，放水喉的意願也下降，投資者憧憬寬鬆政策的希望有機會落空，未來聯儲局何去何從至關重要。
中環茶友形容，而家個市好似啱啱打完大交一樣，累得要命，身子好弱，當然可以唞唞吓慢慢回復正常，但也要小心不再出事。估計港股或會再衝高少少，但除非美國大放水，否則20000點關口前阻力頗大。
內房六月春風來
另外中央政策由緊縮轉為「穩增長」，明顯「見風轉舵」的行業係房地產業。儘管人行、銀監會否認房貸政策放鬆，但中央減息之後的首個周末，各地樓市反響熱烈，特別是新開盤項目，深圳、南京、杭州、上海均出現了排隊購房現象。據中原地產研究中心監測資料顯示，截至14日，北京6月新建住宅簽約，一手成交量近月首次回復「正常」，二手房住宅簽約同比上漲21%，成交量再次出現明顯上漲，係多個月二手成交霜凍之後的反彈。內房龍頭股中海外(688)漲2.7%，另外升得較多是世茂(813)升3.2%。跑贏大市。
證商亦看好，美銀美林前往上海考察時參觀了中國海外的長風項目及恒大地產(3333)的上海啟東項目，並與業內專家會面，該行仍對內房持正面看法，首選恒大、富力(2777)及華潤置地(1109)。
港交所(388)以167億元收購倫敦金屬交易所(LME)，收購價高過市場預期。不少大行認為價錢過高，睇淡是次收購。花旗指港交所收購後短期利潤被攤薄，目標價由148元下調至133元。另外，又指港交所無商品交易經驗，與LME有文化差異，短期挑戰無可避免，要產生協同效應需時，但若執行理想，可以產生巨大收益，評級維持「買入」。港交所昨日沽壓沉重，收市逆市大跌5元至107.4元，總成交超過10億元。
陸羽仁
上一頁 下一頁
金融High Tea 舊文