中環在線：歐債之下全球有錢人反增0.8%香港百萬富翁少咗萬八個 - 李華華
股市波動大香港百萬富翁勁跌
歐債危機立立亂，搞到舊年股市唔多掂，但全球嘅百萬富翁(擁有100萬美元以上資產)數字不跌反升，喺六大分區之中，亞太區富翁人數仲係全球之冠，依次多過北美、歐洲、拉美、中東同非洲。但就個別國家地區嚟區分，香港就唔爭氣啦，同期竟然流失咗成萬八個百萬富翁，原來係因為香港人太注重炒股，俾跌市累死。
根據凱捷同埋加拿大皇家銀行(RBC)最新嘅《全球財富報告》，雖然歐債危機搞極都未完，但係全球富翁數字，舊年竟然增加咗0.8%，最多富翁嘅地方頭三位依次係美國、日本同埋德國。不過歐債危機都唔係完全冇影響㗎，富翁累積嘅總財富就少咗1.7%。唔緊要，多啲有錢人咪仲開心！但可惜吖，香港人就分享唔到呢份喜悅，因為香港嘅百萬富翁人數，跌咗成17%，由2010年嘅10.13萬人，減到舊年得番8.36萬人。
集中炒股累事
有份做呢個調查嘅RBC財富管理亞洲區行政總裁陶仕力話，因為香港人累積財富嘅方法，太過集中喺炒樓炒股，舊年樓市雖然冇冧，但係股市表現咁肉酸，班富翁當然損手爛腳啦，所以咪搞到啲富翁身家縮水，做唔成富翁囉。
嚟緊下半年，RBC估計個市都唔慌好得去邊，如果香港人仲唔識收手，可能嚟緊百萬富翁人數仲少呀。
李華華
mailto:LiWaWa@AppleDaily.com
上一則: 東協研究設關稅優惠
下一則: 中環在線：熊麗萍月尾跳出滙業 - 李華華
中環在線 - 李華華 舊文