金融High Tea 2012年6月21日
金融High Tea——飄忽市揸𨋢搵食
2012年6月21日
■滙控近期走勢唔止強過晒內銀股，大笨象的10天線快將向上突破50天線和250天線，若出現此一交叉，股價很有機會再上行。
■6月內地樓市重現火氣或虛火，住建部、人民銀行、發改委及銀監會等機構，密集地「喊話」，話會繼續落實從嚴的樓市調控政策。新華社
在美國聯儲局作決定前夕，港股非常飄忽，市場期望聯儲局做嘢，港股基調向好，恒指升102點，升幅唔大無乜出奇，但你睇真啲日中的走勢，特別係期指走勢，就精采得多，下午番來15分鐘內抽升近100點，然後橫行，3點半過後半小時內又殺跌100幾點，你以為佢唔得，現貨收市後，期指在15分鐘內又一個深V咁抽番上近100點，三下上落，殺人無數。
中環茶友分析，昨日在聯儲局公佈開會結果前，真正投資者唔敢郁，唔夠買亦唔敢沽，買賣兩閒，你睇成交得414億咁少就知。但呢啲市亦造就炒作期指的大戶搵食，佢地好以揸𨋢咁，忽時炒上，你一跟佢又回吐，忽然插落，你去跟又V形反彈，任佢舞，散戶好易左一巴右一巴。
匯控穩升耐人尋味
茶友話，投資者對股市走勢未形成睇法，令大市十分飄忽，造好造淡都有人信，不過信者無得救，一追入唔使10分鐘就「被食快餐」，被人來100點逼住打靶。呢啲市好難炒，唯有希望聯儲局議息後有個方向，大戶操控難啲，就會易炒啲。
大市整體趨勢仍向上，拉動大市主要係金融股，關鍵在匯控(005)，昨日大發神威，全日一路向上，臨收市略回順，收市報68.45元，升2.4%，成交金額超過20億元，推高恒指70點，另一家國際銀行渣打(2888)亦有唔錯表現，升3%至173.8元。但係睇長少少表現，匯控近期走勢唔止強過晒內銀股，罕有地跑贏渣打，大笨象的10天線快將向上突破50天線和250天線，若出現此一交叉，股價很有機會再上行，挑戰2月、3月、5月都見過的三頂高位72元。
匯控咁靚走勢，背後要有一定數量的買盤，散戶早已對匯控死心，持續買者都是實力派。當然，睇數字匯控絕對不差，市盈率只有9.6倍，息率4.7厘息率，市帳率只有0.99倍，數字幾吸引。問題是以美國為首的國際銀行家家的數字都咁靚，點解有人吸匯控？我靠估提供兩個可能解釋，第一是有內線知道匯控業績在改善中，下一季數字會較靚。第二是變相港股直通車的港股ETF快將成事，內地人要買港股，當然是買內地無得賣的股票，大股中內銀內地有得買，只是匯控和中移動(941)內地無得買，特別是匯控更是鬼佬貨色，更啱內地人口味，會唔會有證券商吸定匯控先，將來整港股 ETF在內地賣呢？斷估無痛苦，可以留意吓大笨象有無上破高位的能耐。
阿爺口術控制房市
借內地減息，威咗幾日嘅內房股，昨日卻逆市回軟。主要原因係6月內地樓市重現火氣或虛火，搞到阿爺四個部委接連出聲，例如住建部就發表文章，話最近跟蹤主要城市成交資料，一些樓盤在5月份和6月上旬出現了明顯的提價行為。住建部重申「繼續堅定不移的抓好樓市調控，積極配合金融部門，繼續嚴格執行好差別化住房信貸政策。」過去半個月，除住建部外，人民銀行、發改委及銀監會等三部委，密集地「喊話」，話會繼續落實從嚴的樓市調控政策。
中國房地產學會副會長陳國強話，中央希望見到的是成交量上升，但房價沒有大幅度上升，房價一旦出現大幅度反彈，必定會推出相應打壓政策。四部委出口術令內房股普遍向下，早前急抽恒盛地產(845)跌近4%。各位內房老總，唔好提價提得太狼，小心玩死自己呀。
陸羽仁
上一頁 下一頁
金融High Tea 舊文