金融High Tea 2012年10月19日
金融High Tea——熱度增 炒弱股
2012年10月19日
內地公布中國第三季經濟數據，三季度GDP和去年相比增長7.4%，符合市場預期，上證綜指向好，升1.2%收市。
內地今年經濟增長逐季下降，第一季增長8.1%，第二季回落到7.6%，第三季再落到7.4%，但跌幅已放緩。熟悉內地經濟情況的高人話俾陸羽仁聽，中國第三季GDP已見底，估計第四季會比第三季高，由於頭三季GDP合共有7.7%，若第四季反彈，全年有望比年初定的7.5%指標好。
H股繼續領跑
第三季數字比較低，阿爺做好防震措施，提早引述總理溫家寶的講話，指第三季的經濟形勢應該說比較好，現在可以有信心地講，中國經濟增速基本趨於穩定，並且繼續出現積極的變化。隨着各項措施進一步落實到位，中國經濟還會進一步企穩。由於中共十八大將在下月8日召開，溫總將會退出政治局常委會，並在明年三月退任總理，溫爺爺這樣講，等如提早宣佈，經濟成功在第三季軟着陸，他功成身退。
回想今年內地股市積弱，除了因為中央收水，亦和經濟衰退得比外界想像中深有關，本來外界估中國經濟增速回落將在第一、二季見底，點知跌開就未停，令資金外流，中國股市在第三季還要再尋底，不過隨着中國經濟軟着陸，可以睇好少少個股市，預計將來再進入反覆向上的周期，A和H股都可以看好，特別是A股跌得太厲害，所以如A50中國基金(2823)這類投資A股的基金，還可以睇好一線。
由於區外區內股市造好，港股跟隨向上，恒指中午去到21600點遇到阻力，收市回順至21519點，升103點。H股牛氣沖天，繼續領跑，國企指數收升145點，造10636點。大市連續6日向上。成交急增至709億元。
鋼鐵造船炒起
市場炒內地經濟第四反彈，9月份水泥業工業增加值按年升12%。華南地區近月水泥價開始回升，廣西市場有望明年復甦。水泥板塊全面炒起，台泥(1136)創逾5個月新高，升8.4%；西泥(2233)及潤泥(1313)漲7.5%，龍頭股海螺(914)三連升，升2.3%至26.55元，創半年新高。建材股亦唔執轎，中建材(3323) 及中材(1893)齊漲7%。
昨日個市都有開始炒弱股的狀況，昨日升得多的紅色股，都係身處弱勢行業，如鋼鐵或造船，好似重慶鋼鐵(1053)、馬鋼(323)、熔盛重工(1101)等。你話壹傳媒(282)大升都有理由，佢賣台灣業務收番46億，但係重鋼急升，無乜特別理由，我覺得主要理由就係炒中國經濟見底，鋼鐵股衰咗咁耐，都要炒番吓啩。
炒弱股風險和回報都一樣咁高，叫得做弱股，當然係成行都弱，或者佢自己的表現在行業中較差，股價跌到好殘。既然強股已炒咗一大浸，但經濟轉勢，估計還有一段轉角市炒吓，注意力就轉移向衰股，呢啲股份短期內業績都係差，只係炒緊佢前景可能轉好，所以唔係無風險，炒炒吓若果突然發盈警，隨時要回頭，不過講得係炒，自然係富貴險中求。好似內房股中，強股如中國海外(688)、華潤置地(1109)早已升咗，大股中恒大(3333)賣樓情況今年較弱，業績有風險，但股價得3個3毫幾，若股市熱度提升，呢啲股都有得炒吓，總之定好止蝕才好買，自求多福啦。
陸羽仁
上一頁 下一頁
金融High Tea 舊文