金融High Tea 2012年12月24日
金融High Tea——炒股容易創業難
2012年12月24日
港股近排升上近22700點高位後，有點後勁不繼。如今年近歲晚，可能都要唞唞，剛好遇上美國上周五又因講極都唔完的「財政懸崖」問題跌120點，港股都好易借勢調整一下。
散戶都喜歡買一些過氣煙頭股，即係過去曾經威過、如今插咗落嚟的股份，由於股價跌到好似煙頭咁低殘，好似股神巴菲特咁講，執起煙頭股，如果可以食番幾啖已經夠本，而且個心仲期望隻煙頭股唔知點解可以變番支煙食好耐。可惜現實經常事與願為，股民執起煙頭股吸極都吸唔着，一啖都食唔到。股神旗艦巴郡隻殼，就係咁買番嚟的煙頭股，股神本來想將原本紡織生意搞番掂，點知結果一錢不值。
買煙頭股係高難動作，上星期講過一隻國美電器(493)，今日想講講另一隻股思捷(330)。思捷在2007年10月高峰期時股價上過120元，依家得番10.72元，好符合煙頭股的條件，加上佢又換CEO，又供股，又有前主席邢李㷧入股，兼且又有高手張松橋在供股時大手買入的傳聞，真係吸盡世人眼球，上月中仲炒過上高位14.08元。
思捷盈警 跟風損手
不過上周二思捷在收市後發盈警，就搞到跟風追入者「一褲都係」，思捷預告本財年上半年業績(即7至12月)可能錄得虧損，主要是10月至今的經營業績較預期差，10和11月亞太區及歐洲銷售表現差勁，而歐洲市場的銷售及毛利率亦較預期遜色。
市場對此大感意外，質疑公司早前對業務重整的說法過份樂觀，見到盈警後估計佢唔止中期業績唔掂，連到明年中的全年業績都有可能見紅。證券界即時做嘢，大降思捷目標價，例如摩通就將公司目標價從11.68元，大劈到7元。思捷股價跟住連跌幾日，上周五收10.72元，比14.08元的上月高位，已跌咗24%，當日跟風追入者已燒傷手指。思捷7月時以二供一方式供股，供股價8元，集資51億元，當日供股權交易作價近3元，即係話若你買入思捷供股權去供，成本要近11元，依家都開始入肉。
市場見思捷玩盈警，生起各種猜測，有睇基本因素話佢過去衰極業績都未見過紅，今次中期業績見紅無辦法唔發盈警。亦有人估大戶炸作方向，話咁搞係玩震倉，震走晒散戶啲貨，先至再炒上。
我分開兩面睇，先講炒作，思捷主席柯清輝、大手入股的前主席邢李㷧，以及傳聞做咗股東的中渝置地主席張松橋，都係猛人，如今猛人雲集，做生意有之，炒作亦有可能，所以估計佢地有後着都好正常。不過若然係震倉，散戶都唔易捱，因為震倉的原因是股份太散，怕一炒高少少就有好多人散貨，好難炒得上，所以要震吓倉，令散戶沽貨投降。不過若然大多數散戶未投降，難保不會殺得更深，這是一個「睇住你睇底牌來賭」的遊戲，對散戶非常不利。你可能會問，若如今殺到散戶一頸血，將來點引到散戶落疊？我話唔使擔心，散戶記憶極其短暫，即使今天殺到你遍體鱗傷，只要明天係咁升，散戶又會乖乖入場。牌面睇仍未排除是一個先殺低、再炒上的賭局。
邢生運大 接棒搞大
若講到基本因素，局面反而清晰，思捷面對的是一個難局。在思捷的股東會上，不少小股東話買入該股是因為見邢李㷧也買入該股，所以有信心，希望邢生再入局掌舵，「點石成金」。問題是即使邢李㷧重回思捷管理層，又係唔係咁易起死回生呢？
在上世紀90年代，思捷一度雄霸歐洲。思捷本名Esprit，呢家公司起源於美國加州，創辦人是設計師Susie Russell與丈夫Douglas Tompkins，他們開設製衣廠搞時裝，兩人在70年代到港尋找採購商，在朋友穿針引線下認識邢李㷧，邢生成了Esprit的採購商，後來他與Susie夫婦共同成立採購代理公司，並在亞洲批發思捷產品。到1996年，Susie夫婦離婚，兩人水火不容，不能再合作做生意，唯有將思捷品牌全球招標出售，邢李㷧冷手執個熱煎堆，從創辦人夫婦手上購入思捷業務，進一步擴大其時裝零售王國。好多人講邢李㷧唔止做嘢叻，仲有運。
到公元2000年打後，思捷生意已經做大，股價係咁升，邢李㷧見好即收，不斷減持，到2006年仲辭任埋主席，真係時間啱啱好。
邢生售股之時，正是歐美日多個時裝連鎖品牌崛興之時，如今全球五大品牌，西班牙有ZARA、日本有優衣庫(UNIQLO)，美國有休閒服巨頭GAP、瑞典有時裝巨頭H&M、德國有平價連鎖C&A，它們先後崛起，雄霸全球時裝市場，Esprit已經不太入流了。
巨頭崛起 自營操控
今年9月，Esprit位於上海中信泰富廣場的萬多呎大型旗艦店悄然關門，內地業界認為Esprit面臨品牌老化危機，在優衣庫、ZARA、H&M、Gap等國際快時尚品牌夾擊下，全面敗退。事實上思捷業務下滑，正急急重整減虧，在全球實施店舖關閉計劃，要關閉80家虧損店舖，當中65家位於歐洲，包括退出西班牙、丹麥及瑞典的零售市場，另外15家則位於亞太區。人進、思捷退，要平反敗局，談何容易。
有業內人士評論，思捷和Zara和優衣庫相比，思捷面對的困難不是個別競爭策略的問題，係經營模式整體過時。思捷過去成功的手法其實等如一個批發供貨商，自營店比例不高，只是找大量代理商代理自己的產品，這個模式的好處是可以迅速做大，不好的地方是加盟商不受控制，對顧客的需求反饋緩慢。
如今優衣庫和Zara根本不是這樣做生意，優衣庫在日本非繁華地區開設巨型自營店起家，以價廉物美產品貼心為招徠，做大做強後才打入核心地段，開始在市中心區開設巨店，巨店本身就是宣傳，也充份掌握客戶需求，今季推的產品客戶受唔受落，不用一星期已經了然於胸。Zara和優衣庫也有類似之處，開創了快速時裝(fast fashion)模式，透過自營店，新IT技術手段，快速反應，提供巨量選擇的商品，滿足客戶的「長尾要求」(即小群體細分的不同要求)。
時代已變 翻身極難
由於這些大品牌已做大做強，思捷雖然請了前Zara的歐洲經理做CEO，但即使他想抄Zara的模式談何容易？小股東想邢李㷧重回思捷掌舵，但時代變了，邢李㷧也不見得有搞現代自營店為主時裝連鎖的經驗。錢也是問題，對手大量開巨型店，競爭門檻抬到很高，即使思捷今天決定抄Zara和優衣庫的模式，不要說它集資的50億，即使用100億都未必夠。思捷需要的不是小修小補，而是二次創業，但要創業談何容易，成功機會頗低，不如炒吓股算啦。
我估思捷要在生意上翻身難度極高，可以假設佢中長線睇基本因素唔得，但唔等如中短線一定無得炒，炒股短期睇供求，唔係睇基本因素。唔好因為基本因素唔得而唔去炒股，你可能會錯過好大升幅，但亦唔好唔知基本因素係乜去長揸股票，你可能坐艇坐到大西洋。以2008年至今都無乜好景的航運業為例，好似中海集運(2388)，你在2008年話佢基本因素唔得，佢竟然可以由08年10月低位0.74元，一直升到2011年1月的4.11元，升咗幾倍；但你以為佢基本因素好得，在高位追入而家長揸不放，而家得番2.27元(已從去年低位0.99元反彈超過一倍)，仲係好傷。炒股睇走勢，揸股睇生意，唔好搞錯。
所以思捷中短線得唔得，有好多人為因素，唔係咁簡單可以分析得到，但你想長線投資，唔好買佢。
陸羽仁
上一頁 下一頁
金融High Tea 舊文