金融High Tea 2013年2月21日
金融High Tea——明呃與自信
2013年2月21日
■翠華未來發展空間主要在大陸，但大陸搞生意，唔係咁易管理，投資者要炒都要有避險之心。
■莎莎農曆年期間銷售暢旺，股價創新高見8.25元，收報8.18元，飆8%。
內地股市喺蛇年終於高收，港股先軟後揚，中止兩連跌，恒生指數回升逾百點，收市重越23300。個別表現最出色係本地日常零售股，莎莎(178)農曆年期間銷售暢旺，股價創新高見8.25元，收報8.18元，飆8%；卓悅(653)彈5%，但同歷史高價仲差好遠。
同樣係土生土長公司的翠華(1314)，升咗一排後昨日再爆上6%，市值去到59億，以佢今年盈利有1.5億去計，市盈率都高達39倍，即使有2億盈利，都有30倍市盈率，炒味甚濃。
翠華老闆想有作為
有個老友打電話俾我，話知我一定會唱翠華貴。我話唔係唔係，我認為貴股唔一定唔買得，只係要抱住炒作心態對待之，唔好炒作當投資啫，無話唔買得。老友話過年前遇到翠華老闆李遠康，同佢傾過一陣，覺得佢係有心搞好公司之人，唔似只係炒一浸派貨就走之輩。
老友都係股壇老手，都識得分唔同人種，我亦信佢的觀察，所以不妨深入啲講講我的睇法。新股又好，半新股又好，如果間公司賺錢賺得好好哋，老闆將隻股上市，起碼將25%利益分出街(要有25%街外持股)，一係未來生意唔係咁得，上市炒高走人，呢種係「明呃」。一係就利用上市籌集資金，加上上市公司的地位，想將公司搞大，呢種係「自信」，即係佢都信自己講的故仔。我遇到第一類明呃的公司，會叫散戶走夾唔唞，因為你即使只係想炒，都好難在這類公司賺錢，因為佢哋睇住街外股東來玩，佢未散貨會炒到你信為止，但散咗貨後小股東無路可走，掂都唔好掂。可以炒的股份，係那些有老闆自信認真想做大生意的公司，但話得說回來，即使老闆胸懷大志，你都唔好假設佢一定成功喎。
味千經驗好景不常
先唔講翠華，講吓同是做餐廳的味千(538)，昨日都升4.8%收5.7元，唔好唔記得，佢在2011年高峰期炒過上18元，現價比高位跌咗68%。味千衰咗單嘢叫做「骨湯門」，俾內地傳媒爆佢的骨湯湯底是兌製而成，唔係佢自己宣傳得咁健康云云，消息出街後股價旋即大插，跟住生意亦大受影響。湯底兌製而成，差不多係連鎖餐廳的普遍現象，佢唔係單頭店，無可能間間在那裏煲，其實沒有甚麼大不了，但被人小事化大，擺明被人搞，可見在中國做飲食生意，即使你成功做到一定規模，但俾人搞起上來，可以受好大打擊。唔可以話味千無認真做生意，只係好景不常。
另一個例子，體育股李寧(2331)，昨收4.72元，佢在2007年和2010年二次升到32元，?家差唔多得番十分一！佢老闆李寧都係好認真做生意，就係太認真，在股價高升時，無集資亦無套現，最後連自己間香港豪宅都賣埋。又係一個認真做生意但挫折都唔細的例子。
睇番翠華，論數字香港餐廳經營效率高啲，翻枱都多好多，大陸生意有前景，但無香港咁高效率。香港鋪租貴、人工貴、地方細，過去一年香港盈利隨時已經見咗高峰，未來佢發展空間，主要係大陸。以上述的事例去睇，大陸遍地開花搞生意，唔係咁易管理，有對手搞你的風險。結論係如果翠華老闆李遠康識玩，隻股仲有得炒吓，但上車者如同參加佢的venture(冒險之旅)，要有避險之心，定好止蝕位至好玩呀。
陸羽仁
上一頁 下一頁
金融High Tea 舊文