金融High Tea 2013年3月19日
金融High Tea——打存戶荷包好恐怖
2013年3月19日
港股見燶味，昨日果然大跌450點，收22083點，跌2%，問題是整個地區都跌，內地股市跌1.7%，日股跌2.7%，歐羅區國家塞浦路斯為求取得歐羅集團和國際貨幣基金會的100億歐羅援助，被逼向銀行存戶收取最高9.9%的一次性稅款，惹起國民強烈不滿，歐羅昨晨在亞洲開市時，一度大插1.9%，到下午歐洲股市早段亦曾大跌，加深了包括港股在內的亞洲區股市跌幅。
塞浦路斯總統安斯德薩德斯為獲得救助，同意實行向銀行存戶「打荷包」的計劃，塞浦路斯所有銀行儲蓄存戶要根據存款數額支付一次性稅收，10萬歐羅以上存款的稅率為9.9%，10萬歐羅以下存款的稅率為6.75%；塞浦路斯政府同時把企業稅率從10%提高至12.5%。
呢個方案真係有「創意」，存款在銀行本來唔會輸錢，但在歐羅集團和國基會設計的「打荷包」計劃下，存款馬上「跌價」6.75%至9.9%不等。塞浦路斯首都尼科西亞的銀行存戶於上周末得知這一消息後，感到十分恐慌和憤怒，紛紛趕到銀行提取現金，但銀行告知他們帳戶已被臨時凍結。後來有數百名塞浦路斯民眾於上周六晚在總統府外舉行示威，反對救助協議。塞浦路斯是三年來第五個因債務危機而向國際救助的歐羅區成員國，市場擔心塞浦路斯國會最終不能通過救助計劃，搞到歐羅大跌。
歐債危機再上日程
我就覺得歐羅集團呢個方案好恐怖，對塞浦路斯而言，的確可以逼到有存款的有錢塞浦路斯人救國，問題係以後邊個歐羅區國家經濟有問題，該國的銀行存戶為怕遇上塞浦路斯式災難，一定會擠提，令那些國家資金大幅外流，死得更快，歐羅集團和國基會咁夾塞浦路斯，唔知有無諗過後果。無論如何，經此一役，歐債問題又上番議程，對港股都唔係好事囉。
內地A股昨日再插1.7%，當中原因都幾黑色幽默。新任總理李克強總理前日會見中外記者時與人民約法三章：一是政府性的樓堂館所一律不得新建；二是財政供養的人員只減不增；三是公費接待、公費出國、公費購車只減不增。公務人員唔可以「食阿公」，釀酒、汽車、黃金相關的奢侈品板塊即時大插。A股跳水，H股無運行。
廉潔成風煙酒乞米
經銷五糧液酒及香煙的銀基國際(886)大跌6.2%至2.12元；在中國內地生產及銷售葡萄酒的通天酒業(389)都挫超過3%。東風汽車(489)、長城汽車(2333)、比亞迪(1211)齊跌超過3%，廣汽(2238)挫4.2%。
新政府在去年中共十八大上台後，已吹起廉潔風，一陣風吹起，內地酒樓貴賓廳死哂，香港名錶店亦無運行。李總理於記者會再講，只是加深市場擔憂，而非新聞啦。我哋大家都想國家好，想國家廉潔，但買中受影響的公司，只能歎句時運低啦。
中資金融股好多未公佈業績，已受市勢逆轉打擊，大家要知個市回頭，金融股將會食到應。昨日重災區係內險股，國壽(2628)將於下周公佈業績，股價近期接連下挫，昨日再跌3.9%至21.1元，20元大關岌岌可危。
大市昨日連22000點都穿過，短期雖似會再尋底，但跌得太急亦可能有反彈，不過反彈係打開逃生門，揸重貨者要把握機會走啦。
陸羽仁
上一頁 下一頁
金融High Tea 舊文