金融High Tea 2013年4月16日
金融High Tea——跌舖「金」
2013年4月16日
美國近期公佈的連串經濟數據，幾乎瓣瓣都唔差過預期。繼ISM服務業指數及非農就業指數遠差過預期後，上周公佈的零售收入及消費者信心指數跌至九個月新低。
經濟疲弱，商品價格全面急挫，市傳塞浦路斯政府可能沽黃金套現吊命，黃金更係跌到七個一皮，上周五直插至1491美元才喘定，收市勉強企於1501美元，跟住周一又插過。
大行紛紛睇淡未來金價，高盛更將未來十二個月金價預測由1550美元大幅下調至1390美元。金價昨日仍未能止血，紐約金價一度低見1404美元，暴瀉97美元。黃金由千禧年的大約每安士200美元起步，一路升至2011年8月的1920美元，狂升了8.5倍，之後在短短唔夠兩年回落超過25%，市場普遍認為黃金熊市已來臨，警告投資者不宜「炒底」。
金價暴跌，黃金相關股首當其衝。SPDR金ETF(2840)及價值黃金ETF(3081)齊插近8%至1080元及35.45元。
金礦股全線大跌，紫金(2899)及靈寶黃金(3330)齊跌約7%，招金(1818) 最甘，勁插9.9%至8.6元，接近52周低位，但唔好以為金礦股已經跌好多，因為金礦股同金價關係，好似地產股同樓價，通常樓價跌，地產股下調幅度都會跌突。金飾零售股亦無運行，跌得最痛係六福(590)及周生生(116)，分別挫7.5%及6.6%。
金礦股要小心
IMF上周五下調美國及全球經濟增長預期。內地昨日公佈的首季GDP年增長只有7.7%，就差過市場預期。國家統計局新聞發言人解釋，首季各國經濟仍處調整，復甦緩慢，特別是發達國家相繼採取量化寬鬆的貨幣政策，對中國匯率產生壓力，也增加了中國大陸出口的難度，導致GDP相對低迷，但對全年完成GDP增長目標達7.5%仍有樂觀預期。
美銀美林昨日指出，市場一定會對疲軟的數據感到失望，但相信第二季GDP將因市場重拾信心和政策扶持，數據開始反彈。
貴金屬、能源及資源股全線向下，加上內地股市下跌拖累，歐股開市不利。港股在多重不利因素「圍毆」下，恒指朝早急跌後橫行，收跌316點至21772點，國企指數仲弱，跌215點至10441點，大市成交只有550億元。
喊欄甩身算好彩
壹傳媒昨日宣佈出售台灣電視業務，價值係3.628億元，出售預期錄得虧損5.228億元，數字代表賣價同壹電視資產淨值間的差額，換言之，今次出售電視平過名下資產，可以話係「喊欄價」，旨在甩身。
有熟悉台灣傳媒市場的茶友話，台灣傳媒生態同香港剛剛相反，香港係報紙進取、電視保守，台灣就係報紙保守，電視就乜都玩到盡，壹傳媒去台灣搞報紙就如似虎入羊群，三、兩下手勢已經贏晒，但搞電視就慘嘞，變成老鼠拉龜，無地方入手。今次賣盤只係計帳面資產條數，無計一路經營虧損，如果連呢筆流水帳都計埋，做電視輸錢的數目仲驚人。
壹傳媒去年傳出賣資產前，股價低跌到0.455元，當傳出賣台灣業務後股價爆上1.76元水平。現在雖然賣報紙業務觸礁，但甩到出血最厲害的電視業務，基本上難題總算解決，大平賣都無所謂啦。
陸羽仁
上一頁 下一頁
金融High Tea 舊文