金融High Tea 2013年4月9日
金融High Tea——要死唔使病
2013年4月9日
經過上周五大跌，港股反彈無力，有人列舉好多利淡原因，包括葵涌碼頭危機、朝鮮半島局勢緊張、大陸禽流感威脅，以至歐債危機等，總之由遠到近，成個世界啲衰嘢都好似關香港事，中環茶友就話，港股早排已見大戶托住重磅股沽貨，感覺唔係咁好，而家證明不祥預感好「靈擎」。
茶友覺得個市唔對路，聽落好似係直覺，其實諗真係有因有由。近大半年，茶友已經成日話，做生意經營成本高，就算睇落旺，利錢都好難維持，一有失閃就隨時蝕入肉，咁樣環境商家心中有數，大家都係「縮窒縮窒」，等緊個市跌落嚟，今年起好多社會事件，都係不斷削弱投資環境，好似打擊樓市措施、限奶令等。
跌咗眼鏡要搵解釋
本來樓市旺、零售旺係好事，但凡事總有臨界點，樓價升到頂唔順、舖租加到頂唔順，就會借頭借路出事，政府呢個時候踩一腳落去，咁就有可能踩冧個市，好似打壓樓市措施，一招唔夠整夠兩招，而且出招愈出愈快，愈出愈密，而家已經搞到地產代理半死，跟住就係銀行、裝修等行業，有人話而家連賣電器都影響埋，本地消費遲早玩殘，咁樣股市點可以獨旺呢？其他理由好似債務危機、打仗威脅，都只係藉口啫，正如茶友話齋，應死唔使病，個市要跌落嚟，事後解釋只係合理化點解分析家跌眼鏡而已。
講番大市，港股上周五被淡友殺個血流成河，全軍覆沒，昨日依然未見預期反彈，朝早再插114點才反彈，午後一度倒升近50點，內地股市長假期後復市，走勢麻麻，二手交投仍低迷，藍籌本地地產股被拋售。港股尾市再度回軟，恒指收市微跌8點，收報21718點；國企指數原地踏步，收10430點。大市成交薄弱，只有580億元，睇嚟大市就算回升，或者都只係補倉帶動，仲未能肯定見底。
內地爆出H7N9禽流感疫情，全國最新疫情報告共有21宗確診病例，上海最多10例，死亡人數4人。到目前為止，專家仍然未確認病菌源頭及傳染途徑，不過情況的確較前惡化，病情有擴散跡象。食物及衞生局局長高永文表示，要有心理準備，香港隨時爆發H7N9禽流感，市場乘機炒作醫藥股，股民見「藥」字就炒。例如主業與製藥已經無乜關係的泰凌醫藥(1011)，股價四日內喪炒高超過45%。昨日回調15%至0.93元。
航空股彈一彈
航空股方面，南航(1055)、東航(670)及國航(753)上周五就急插超過一成。昨日有大行唱好，航空股全線反彈。美銀美林表示，雖然內地禽流感已錄得數人死亡，但現階段未出現人傳人個案，沒任何旅遊警示或疫情顯著惡化下，該行認為股價過度下挫。
過去「SARS」經驗，當時股市於兩周內平均下挫17%，但提供買入的好時機，其後於三周內股價已收復失地。目前航空已跌了近12%，估計進一步下行空間亦有限。在疫情影響下，內地航空業較國際航空更具彈性，預期南航在板塊中更具防守性，重申南航及東航「買入」評級，目標價分別為5.05元及3.9元，認為最近被拋售後估值出現臨時折讓，提供買入機會。相反國航最容易受國際旅遊影響，故維持「跑輸大市」評級。航空股逆市反彈，南航及國東航反彈3.3%及2.9%，國航表現最好，彈4.5%。
陸羽仁
上一頁 下一頁
金融High Tea 舊文