金融High Tea 2013年6月18日
金融High Tea——國家隊入場
2013年6月18日
■太陽能股昨日炒味甚濃，龍頭股保利協鑫能源及卡姆丹克抽高7%，陽光能源急抽高12%，睇嚟光伏股可以炒到政策真正出台。資料圖片
港股終於出現較似像反彈，恒指昨開市重上21000點，收報21225點，升256點。國指比較失色，但仍有77點進帳，收市報9744點。大市成交562億元，交投淡靜。
昨日美股和A股都唔係幾得，但港股卻出奇地硬淨，最簡單的解釋就係早前跌突咗要反彈，因為港股由上月20日高位23512點，跌到上星期三低位20652點，3個星期內好似高台跳水咁直插2860點，若然反彈有少少力水，升番到21600至21700點都唔出奇，我估主要睇聯儲局議息結果就唔就，若然儲局無收水的暗示，港股有機會反彈上較高位置。
阿爺唔想股市跌
內地情況亦值得留意，有國家隊之稱的匯金公司，上周入市增持光大銀行、新華保險(1336)的A股，合計動用逾億元，光銀和新華保險還在公告中表示，匯金承諾未來6個月繼續增持。此外，市場還傳聞匯金大手筆買入上證50 ETF等指數基金。這是匯金自2008年9月以來第3次入市，今次在上證綜指跌穿2200點後出手，預計若內地股市再跌，匯金還會再買。過去匯金出手多數買工、建、中、農四大行，今次從光銀和新華保險入手，而且金額較細，估計只是開始，未來還陸續有來。
按過去經驗，匯金入市不代表A股即刻升，通常匯金出手後股市還有得跌吓，但匯金入市是一個指標，既顯示股票開始變得便宜，也顯示阿爺唔想股市再跌太多。咁又係，經濟已經弱，若股市又大插，真係對消費都有影響，變成惡性循環。
昨日港股上升主要由地產股及公用股帶動，似乎是偷步博聯儲局會議無料到，所以資金入場博這兩類最受利息上升影響的股份反彈。
另外，昨日市場亦受併購消息及國家政策消息所左右，長實(001)及其同系成立合營企業，以接近98億元收購荷蘭廢物處理及焚化廢物生產可再生能源企業，搶盡市場目光。
美銀美林估計，有關資產的收購作價具吸引力，股本內部回報率達12.5%，屬不俗的回報。收購意味長建(1038)首次進軍歐盟，相信未來或會有更多同類型收購，尤其位於北歐；美銀美林維持長建「買入」評級，目標價看60元。
長建電能長線睇好
長和系昨日表現強勁。長實表現最勁，升3.7%至108.6元，和黃(013)第二，升3.4%至81.45元；長建及電能(006)齊升3%。4隻股票成交額23.8億元，佔大市總成交額4.2%。由於長建在項目持股最大，佢在3隻參與項目的股份中市值又最細，即係佢比例上受惠最大。
長建近年走勢極靚，上月22日炒到近歷史高位58.35元，跟住隨着加息陰影插到低位50.15元，如今處反彈中，呢幾年電能和長建的走勢，好過阿媽長實及和黃，兩家公司都有收購公用事業項目壯大的前景，長線睇好，但中線大市壓力仍在，長建、電能只能低吸，高追無乜着數。
另外，太陽能股又發威，有報道指國務院日前召開常務會議指出，光伏產業是新能源產業的重要發展方向。太陽能股昨日炒味甚濃，龍頭股保利協鑫能源(3800)及卡姆丹克(712)抽高7%，陽光能源(757)急抽高12%，睇嚟光伏股可以炒到政策真正出台。
陸羽仁
上一頁 下一頁
金融High Tea 舊文