金融High Tea 2013年6月27日
金融High Tea——有性格的狗
2013年6月27日
今年期指結算，港股昨日繼續大反彈，恒指大升482點收場，收報20,338點，上升2.4%。港股有時好似大陸市跟尾狗，有時好有性格自己行，昨日就玩性格啦，大陸早段跌，港股已經唔跟要升，到兩點後大陸仲喺輕微跌市橫行，港股就發力抽上，兩個鐘抽升成300點，大拋離大陸，內地跌0.4%，我哋大升2.4%。
港股呢隻跟尾狗點解變得咁有性格，我估同期指結算有關，星期二大跌市一點幾期指低位19394點，散戶震晒要打靶時，大戶就出動接期指，唔好話在最低位，在19500點左右大手開好倉，然後大力夾上，夾到今日期指結算，等到收市自動平倉，真係食800、1000點輕鬆自如。香港唔跟外圍時必有原因，期指結算係一個原因，大戶做咗一個方向，外圍走啱方向就跟，唔啱方向就死頂住，反而頂一兩日成本有限，都唔使買現貨，不斷掃期指，都可以扯住現貨上。但唔好俾呢啲人為因素左右，當佢目的達到後，大戶食夠走人，個市自由行，又回復個狗樣，跟人哋走。
反彈目標21000
當然，大戶做嘢，都唔可以完全逆天而行，股市天體運行，有基本因素，有技術因素，呢一陣子的技術因素係個市跌得太快太急太超賣，跌到咁上下，任何一個消息或動作，都可以觸發股市反彈。
港股近期高位係上月20日的23512點，一個月內急插到本周二低位19426點，跌咗4086點！中間無乜抖過，都係時候反彈。假設只是反彈跌幅的0.38，都可以彈到20978點，所以在跌市中一跌，短炒方向必是炒反彈。大家要注意呢啲所謂0.38只係一個黃金分割位，個市強(例如美股強)可以彈多啲，下一個黃金分割位係0.5(21469點)，個市弱未到0.38都可以回頭(例如大陸短期止唔到跌)，所以話可以彈到21000點只係一個參考，但要注意一件事，如0.38係一個參考值，若反彈遠不到21000點此位就再插，顯示個市弱，下一步穿底機會好大，若反彈遠高於21000點，顯示市底強，那麼本周二那個低位可能已是全年低位。
大市反彈，收到幾個電話，第一係茶友甲，在高盛沽工行時(1398)，有銀行叫佢做股票掛鈎票據，行使價約5元，佢問我我叫佢唔好做，我話高盛沽貨，接貨者想買保險就想買5元行使價的認沽期權，期權市場根本無咁多人沽貨，就變個款包裝成股票掛鈎票據沽出街，我話做乜咁笨要貪少少「息」高位沽期權，想買工行，一定可以低過5元買到。結果工行本周二低位是4.39元，昨日即使彈咗6.8%咁多，都只係4.7元，要買都可以買。
第二個打來係富婆乙，我周二好忙，佢搵我唔到，佢本來想問我買唔買得過，結果搵唔到我佢買咗貨。我話你好彩，但你聽到我同你分析完你可能唔敢買。不過我問番富婆乙，你到底係長揸還是短炒，佢又答唔到。我話如果你想長揸要準備買貨有可能穿底，若短炒見個市急彈上近21000點時，可以先沽。
做賊心慌 有餘未盡
呢一輪大陸跌市係因為內地銀行業資金緊絀，工行董事長姜建清接受訪問時表示，工行願意在市場出現波動之際，發揮自身有流動性優勢，穩定市場，但佢哋希望將來政策預期能更清晰更穩定，以利該行理解市況。對於有人傳謠言甚至做出操縱市場的行為，監管方面要予以懲罰，亦要及時解釋澄清。姜建清稱，今次內銀流動性緊張是「心慌」而非「錢荒」，工行亦用了數日時間才弄清風險及市場波動根源。由於多種因素交疊，加之人民銀行公開市場做法改變，突然使市場流動性短缺，但他認為只是造成流動性短期波動，中國銀行業流動性總體正常、充足。
聽完工行咁講，我並未釋懷。連工行都要搞幾日才弄清波動性來源，證明呢一仗阿爺都挾得好大力，無人做賊，何用心慌等阿爺出手顯示一個態度改變，唔俾銀行濫借，要擠出水分，未來在各大行業，會唔會做同樣事情，對國企盈利有何影響？個市係唔係插一插就反映晒政策轉變的風險。
陸羽仁
上一頁 下一頁
金融High Tea 舊文