金融High Tea 2013年7月19日
金融High Tea——盈警潮有排玩
2013年7月19日
美國聯儲局主席周三第一場聽證會講到人瞓着，全無新意，港股迷失方向，微跌26點收場，等埋佢第二場聽證會，但我估有料到的機會不大，港股自求多福。
家港股最大的利好因素係美股，美股創新高，港股即使無大升都難大跌。但內地因素仍然利淡，雖然總理李克強唱高音話經濟增長率不能滑出下限，令人重燃中央放水救市的期望，但開心唔到兩日，財政部長樓繼偉就唱低音，話今年中國不會推出大規模的財政刺激政策，希望馬上幻滅。
傳統話五窮六絕七翻身，其實同外圍股市有關，美股按季出業績，1月、4月、7月都有數出，年頭炒一浸，4月出完第一季業績，年中例靜，個市就回，到7月再出第二季業績又炒過。但今年美股照炒業績，但香港股票、特別中國公司，半年業績似乎無忽好肉，8、9月出半年結，盈警預先殺到，我哋好似唔係炒業績，係沽業績。
水泥股昨日無運行，皆因山水水泥(691)發盈警，話預期截至今年6月底上半年，純利將按年下跌不少於40%，主要是由於上半年銷售價格持續偏低。山水昨日最低見3.08元，跌11.5%，收3.11元，跌10.6%。另外，安徽海螺(914)跌1.5%，華潤水泥(1313)跌1.2%，中國建材(3323)跌1.5%，唔好以為佢哋跌得少，隻隻都已經由20樓跌落嚟，家想再跌都軟晒咁款。
山水盈警累水泥股
講番山水水泥，德銀話佢預告中期盈利跌至少40%，令人感到意外，假設跌幅為40%，意味着其中期每股盈利，僅達該行預測的35%，市場預測的27%。山東省及遼寧省上半年水泥需求疲弱，山水的產能利用率低，令成本相對高。由於山東產能過剩情況太厲害，水泥廠商價格協調不成功，令山水水泥無法在第二季傳統旺季加價。
德銀預測料產能過剩問題不可能快速解決，年內山東省定價將保持疲弱，這將為山水本已緊張的資產表帶來額外壓力，因其淨負債率已達到150%。德銀相信出水正式公佈業績後，市場將進一步下調對該股的預測。德銀維持山水「持有」評級，目標價3.19元。
生產風電和船舶設備的中國高速傳動(658)又在收市後發盈警，預料中期業績按年將轉盈為虧，主要由於向客戶交付產品的價格及數量均下降，導致營業額減少，以及銷售及財務成本增加所致。
市縣政府無水找數
中傳動昨日盈警未公佈股價先跌3.1%，收3.47元。風電及相關設備股走勢同水泥股唔同，水泥股本來已插到地底，但風電股本來幾強，中傳動去年下半年仲有約4200萬人民幣盈利，若今年上半年轉虧，唔知市場有無預佢咁差。
雖然阿爺話銀行體系有水，但我知道企業和地方政府都相當缺水，有些地方政府外判咗污水處理廠畀民企做，但過晒期都找唔到數，同政府做生意的民企真係實力少啲都唔掂。另外，大量民間借貸又收唔返，本周一陝西神木縣就有幾千人圍縣政府，呢個靠煤礦發達的小縣，人口不到50萬，去年GDP突破了1000億元，結果人人搞借貸，周一在手機流傳將離任縣委書記虧空300億的短訊，市民怕縣政府唔掂收唔到債，就去圍政府唔畀書記離任。
這種環境，銀行有錢都唔敢亂借出街，地方政府缺水，傳聞幾個大省都上京求財政部鬆手啲唔使佢哋上繳咁多，大省如此，小市、小縣真係好危。資金不轉如血流不通，企業業績好多都唔掂，將會在半年結反映出來，除非美股暴升，否則港股想向上炒都相當舉步維艱。
陸羽仁
上一頁 下一頁
金融High Tea 舊文