金融High Tea 2013年7月30日
金融High Tea——摸吓底死唔到人
2013年7月30日
在期指結算前夕，昨日港股叫做頂得吓，日圓升值令日股大跌3.3%，中國審計署到各省市審計，內地股市四連跌，上證指數兩千關亦告失守，插1.7%，內險及證券股均受壓。外圍風風雨雨，但恒指只是跌118點，叫做逆勢撐住，大市成交只有422億，想頂都唔係要好多子彈。
內地工業利潤升幅放緩，已叫人對經濟擔憂。中國審計署又在這時出手，由下周開始進駐各省市全部進點審計。審計署過去曾於2011年3月至5月做過類似對地方政府的審計，結果顯示，截至2010年底，除54個縣級政府沒有政府性債務外，全國省、市、縣三級地方政府債務餘額共計10.7萬億元人民幣。今次又要睇吓審出多少地方債啦。
我就話中央查數消息雖然嚇人，但最後唔會有太驚人的結果，死唔到人。理由好簡單，中央的目標係去摸底，唔好等地方其實破晒產阿爺都唔知，若果摸出來的債務尚算合理，就會如實公佈。萬一債務太嚇人，我估即使美國政府都有方法唔公佈，何況我哋祖國政府，所以我想像唔到有一天新華社會公佈一條消息，話中國哪個省市好似底特律咁破晒產。話說回來，中國的省市情況亦真係比底特律好好多，底特律根本無生意，但中國地方仍有生意，即使有問題都係資金周轉的問題，充啲水落去又會搞番掂。
昆侖能源借傷成毒
但昨日一句審計，內地股全線無運行，金融股都唔算跌得多，能源、材料和建材股先至插得慘，個別本身行業有問題的借勢大插，例如昆侖能源(135)受原料氣價上升影響，近插兩日，昨日跌6.2%，是最大跌幅藍籌，早已插穿今年低位，睇格局是跌穿大位後有基金止蝕洗倉。
歐盟已跟中國就內地光伏產品傾銷歐洲的爭議，達成解決方案，但光伏股表現好壞參半。保利協鑫(3800)升1.53%，報1.99元；興業太陽能(750)同卡姆丹克(712)都跌，後者仲瀉夠5%，報2.15元。近日市場愛炒環保或新能源股，不過，呢類公司一向波動，如果心臟唔係咁好，唔想太過刺激者，都係揀番啲實力龍頭股，好似龍源電力(916)、光大國際(257)咁，吼佢低位買吓，呢啲股雖然貴，但至少跌起上嚟，股東仔無咁易心血少。
弱股試底要試真
地方審計基建相關行業唔掂都合乎邏輯，因為地方政府本來睇住GDP數字搞政績工程，一唔到數就借錢起基建，充夠條數。如今中央查數等如未來唔可以再立亂借錢搞基建，咁啲水泥建材賣畀邊個？金隅(2009)跌3.6%，中鐵建(1186)跌近3.9% 。
講開又講，早前克強總理話要保7%，建材、水泥股炒咗幾日，我就覺得佢哋未跌夠，如今搵到個理由回吐，我覺得呢啲弱股，都係要試一吓之前個低位夠唔夠堅實，先至可以講跌定。
新股方面，本地數據中心代管供應商及建築承建商佳明集團(1271)，是次上市集資所得的65%，將用於發展葵涌第二座的數據中心大樓，預計總投資額6.8億元。主席兼執行董事陳孔明強調，本港的高端數據中心毛利率相當高，截至3月底止年度，毛利率達到76.1%，數據中心市場正處於高速發展階段，存在龐大商機，集團有充足的經驗和品牌，在市場建立地位。該股訂價0.9至1.11元，入場費4485元。
陸羽仁
上一頁 下一頁
金融High Tea 舊文