金融High Tea 2013年8月8日
金融High Tea——有人漏夜趕科場
2013年8月8日
港股漸現弱勢，昨日亦連續第2日低收，恒生指數跌穿250天線，收報21588點，跌334點，亞洲區內股市普遍受美股影響下跌，美股杜指跌0.6%在前，內地上證綜指跌0.6%在後，日經指數在午後跌勢轉急，收市大跌576點，跌幅4%，令港股在午後跌勢加劇。
本來美股下跌，皆因呢兩日有愈來愈多美國聯儲局官員大合唱，話要9月開始退市，美股本來無反應，到上日開始跌番一啲。美國收水，美元應該睇升，日圓應該跌，但日圓呢兩日又無厘頭大升，日股就腳都軟哂，大幅下挫。
強股回吐 見頂先兆
港股強時，外圍跌唔肯跌，呢一浪開始露出弱態，自上周五見22291高位後，本周二俾匯控(005)業績打一打，就抬唔起頭。中環茶友話，港股話咁快從高位唔見700點，有可能係一浪調整的開始，第一棍向下有力，確立咗個跌勢，通常有200、300點反彈，然後再向下，不是直線向下。佢話強股回吐，係大市見頂先兆，因為強股都開始唔掂。先失手的是本來都好強的匯控，周二跌完5%後，昨日持續有沽壓，收報84.1元，再跌1元。
另一隻超強股是騰訊(700)，一度升至380元的上市新高，升1.2%，其後單日轉向急滑，收市報360.2元，跌15.4元，倒跌4%。其他科網股急回，金山軟件(3888)收市跌3.6%。
茶友話，騰訊無乜壞消息，純粹係抽上高位後力盡而回，剛好回到最近個幾月一條好急的上升軌下方，佢6月低位269.4元，和昨日新高380元比較，高低差110.6元，即使回吐升幅的0.38倍，都要回42元，即係回到338元，而家走去揸佢有一定風險。
昨日有報道指，廣州越秀集團計劃斥最多87.8億元，收購創興銀行(1111)控股權。創興銀行及廖創興企業(194)雙雙停牌，市場憧憬銀行業併購潮再起，可能成為收購對象的大新銀行(2356)急升14%及大新金融(440)升9%。
創銀有價 內企佔場
報道指，越秀已籌得10億美元過渡貸款作收購之用。收購價較創興現時每股帳面淨值存在溢價，但幅度不會超過2倍市帳率，創興銀行停牌前收22.45元，市盈率18倍，市帳率1.32倍，若越秀按市帳率1.5至2倍提出收購，每股作價約25.5至34元，整體收購價將為65.9億元至87.8億元。
大新銀行大升完都只係0.79倍市帳率，市盈率9.9倍，雖然市值較大有140億，但市帳率和市盈率都遠較創興銀行為低，所以有炒作空間。
市場上可能不太明白，越秀既非銀行業，來港收購銀行搞邊科。明白行情的不難了解，香港市場較細，又是成熟市場，香港如一個窗口，如能利用這個窗口的特點，又作別論，銀行業就是一個融資窗口，內地銀根緊，香港銀根鬆，當內地水乾到死時，香港卻水浸，加上利息較低，若能在香港吸水，在內地投資，真係好易搵錢。
越秀地產(123)之前將廣州IFC注入越秀房產信託基金(405)，就是想盤活越秀地產的資金，若再進軍香港銀行業，直接涉足香港的資金池，潛在吸水的空間好大。呢個世界有人賣生意辭官歸故里，有人買生意漏夜趕科場，特別是一個只睇香港生意，一個借香港睇大陸生意，角度好唔同也。
陸羽仁
上一頁 下一頁
金融High Tea 舊文