陸羽仁 BLOG 2013年9月17日
多謝敍利亞
2013/9/17 9:24:54
網誌分類: 經濟
全球投資者應該多謝敍利亞總統巴沙爾，原來佢係推到前美國財長薩默斯(Larry Summers)決定退出角逐聯儲局主席的功臣。
美國總統奧巴馬原本最希望薩默斯接伯南克個位，其實早在奧巴馬上任時，都盛傳奧巴馬喜歡薩默斯，只係等機會俾佢接伯南克個位。日本《產經新聞》上週五就報導奧巴馬將於今個星期三宣佈提名薩默斯出任下屆聯儲局主席一職，空穴來風，未必無因。
但華爾街以至奧巴馬所屬民主黨對薩默斯意見好大，因為薩默斯一向反對量化寬鬆(QE)，認為副作用太大，市場認為佢一上任就會強硬收水，對QE持寛鬆態度的聯儲局副主席耶倫自然較受歡迎。
民主黨議員唔鍾意薩默斯仲有一個原因，很多民主黨議員指責薩默斯在出任財長期間，支持政府減少對金融銀行業監控管理的政策，認為他是造成2008年金融危機的「元兇」之一，參議院銀行委員會的民主黨人已經公開反對提名薩默斯為聯儲局主席的候選人。此外，薩默斯間中又會語無倫次得罪人，例如2005年他在哈佛大學的演講會上話，女性天生在數學和自然科學方面能力弱於男性，又搞到女議員好激心。
不過薩默斯得到總統奧巴馬歡心，本來仲係大熱，奧巴馬真係想一意孤行委任佢，不過出兵敍利亞事件扭轉大局。事緣奧巴馬傖促想用兵，點知得不到北約盟友支持，只有法國一個國家拍心口上，英國國會更投票反對出兵。美國國內壓力大增，要國會先通過出兵議案，奧巴馬唯有大力遊說議員，在國會山打了一場大仗，結果都係無功而回，搞到奧巴馬唔上唔落，後來仲俾俄羅斯食埋夾棍，捉住美國國務卿叫敍利亞銷毁化武一句話，成功拉到美國不可動武。
奧巴馬在國會受重創，已無力氣在國會內再打一場仗，叫自己友民主黨人不要反對薩默斯做聯儲局主席。美國政壇中人估計，星期日薩默斯到白宮見奧巴馬，其實係奧巴馬告訢薩默斯不能再支持他角逐，叫薩默斯自己退出，所以薩默斯事後才補一封信俾奧巴馬，若薩默斯一早諗住唔撈，應該寫定信才去白宮。所以美國眼中釘的敍利亞總統巴沙爾，就係射低薩默斯的功臣。
薩默斯無得撈，現任聯儲局副主席耶倫再次成為最熱門人選。美股開市就升，但後段升幅收歛，杜指升119點15495點，升幅0.8%；標準普爾500指數收高10點，報1698點，漲幅0.6%。納指卻受蘋果下挫拖累，逆市跌4點，收3718點。
投資者憧憬QE可能冇咁快退市，亦推動了美國國債價格上漲，債息下跌。美國10年期國債息由2.9厘跌番落去2.8厘水平。
聯儲局周二週三開會，盡管美國近日公佈的經濟數據唔係好得，昨日公佈的9月份紐約聯儲製造業增速較上月放緩，相關指數意外地由8.2點大幅下滑至6.3點，明顯不及市場預期的9.4點。另外，加上此公佈前就業與零售數據的增長都不如預期，消費者信心也因利率上漲的影響而有所下降。但市場普遍預期聯儲局公開市場委員會(FOMC) 會公佈今個月開始減少買債，但經濟增長離預期有一段距離，減少買購規模唔會大，預計會在每月減少100億美至150億美元。
分析指，股市從8月份的歷史高點一度回調了7.5%。從某種角度來講，聯儲局其實已經進行了「沒有實際數字的縮減。」睇美股跌完之後，近日不跌反升，股市恐懼指標VIX指數長期維持在14點低水示，反映投資者打完防疫針後已適應咗，對後市睇法樂觀，只要聯儲局唔好搞隻「黑天鵝」出來就得啦。聯儲局打響退市第一鎗，股市卻可以平穩過渡。
陸羽仁
回應(5) 我想回應
陸羽仁 BLOG 舊文