金融High Tea 2013年9月17日
金融High Tea——講金唔講心
2013年9月17日
■澳門選完立法會，濠賭股即大升。資料圖片
講你都估唔到，美國聯儲局呢兩日開會決定收唔收水，點知突然來一個「薩默斯升市」。事關前美國財長薩默斯一直係接任聯儲局主席大熱，傳聞美國總統奧巴馬好喜歡薩默斯，但此君出名手硬，佢做聯儲局一定大力收水，搞到美國華爾街好多人反對，有時總統都唔係話晒事，結果就係薩默斯在周日黯然向奧巴馬宣佈自己唔再角逐。
嘩，消息一出市場就高興咯，薩默斯唔玩等如收水放慢，即刻令杜指期貨香港時間昨日晨早升150點以上，美債上升，債息下跌，美元相對日圓、歐羅回軟，迎來一個「薩默斯升市」。
亞洲市場反應都幾熱烈，特別因為美國收水跌咗唔少的亞洲股市更龍精虎猛，印尼升3.4%、菲律賓升2.8%。不過內地股市唔係好跟美國玩，高開之後反覆回落，上證綜指跌0.2%。港股氣勢如虹，恒指開市突破23000點之後，在高位橫行，大漲337點，收報23252點；國企指數升167點至10706點，美中不足是交投偏淡，成交縮減至546億元。
選舉一過賭股升
未來兩日還要睇聯儲局收水決定如何，但如果少少地每月買少百零億美元債券，市場都已預咗。
你估都估唔到，澳門選完立法會，濠賭股竟然大升。一般股澳門立法會選舉消息對股票只屬中性，點知結果都有少少出人意表，有玩賭場業務的陳明金則大勝，得17%選票成為票王，其名單拉到三個人入局。澳門民主派滑坡，新澳門學社由三席變成兩席，雖然另一泛民高天賜以些微差異打低賭王四太太搶番佢第二席，但澳門民主派力量削弱了。澳門人戲稱選舉結果顯示澳門人講金唔講心。
唔知係唔係因為澳門民主派和工會勢力減弱，加上經營賭廳者又做票王，搞到賭股好興奮，金沙(1928)升3.2%、澳博(880)升4.2%、銀娛(027)更大升5.7%創晒新高。論邏輯唔係幾明，四太選舉唔係咁順利，點解澳博仲升咁多？
我哋好多時話內線人知情，好似隻金沙，佢行政總裁Edward Matthew Tracy 於9月5日行使認股權即沽，再減持共43.9萬股公司股份，共套現逾2000萬元，好倉降至100萬股或佔0.01%。金沙昨日再上47.75元，逼近高位，行政總裁沽貨，市場都無大反應。或者可以咁講，即使行政總裁睇到公司基本因素值幾多錢，但市場鍾意炒高啲，又可以炒高啲喎。
官方話內銀風險有限
中資金融股係領漲火車頭。恒生中國H股金融行業指數升1.6%。中銀監業務創新監管協作部主任王岩岫日前表示，中國銀行的業務風險情況可控。他認為內地所有銀行都係持牌銀行，其理財產品都是在監管之下，因此不應該算入影子銀行，而理財產品的風險亦遠遠低於票據的風險。可以咁講，內銀股價唔貴，主要怕有風險，你話風險不大時，會吸引多啲人買。
內銀「九行」全線炒上，重磅股匯控(005)表現亦不俗，升1.3%至87.1元。本地銀行股中表現最勁係繼續炒作收購概曾創興銀行(1111)。市傳有四、五投資者有興趣收購創興銀行，其中越秀集團更願意提價至市帳率達2.4倍，已達到大股東廖企(194)意向價，交易有望本周拍板。受消息刺激，創興銀行昨日飆升超過一成至31.7元，創52周新高。
陸羽仁
上一頁 下一頁
金融High Tea 舊文