金融High Tea 2013年9月12日
金融High Tea——智能機熱潮變味
2013年9月12日
昨日大市微跌39點，無跟美股升，港股升咗咁多，消化吓都好正常，但美國媒體開始做中國經濟轉暖的古仔，預計會吸引一定資金去吸納香港的紅色股。
蘋果在美國加州舉行新品發佈會，公佈兩款新版手機，貴版iPhone 5S手機有指紋識別新功能，平版iPhone 5C手機大玩五顏六色，老實講沒有太大驚喜。以蘋果推機速度咁慢，但推出的新功能震憾程度只如三星的「眼控」或「隔空操控」功能，甚至只玩玩機殼顏色，稍嫌驚喜不足，人哋三星幾個月出一款機都製造到接新力度的驚喜。
蘋果發佈新iPhone對其股價影響次次如是，簡單講係好消息出貨，發佈會一開蘋果股價就跌1.3%，收報494.64美元，下跌2.3%。
新iPhone無驚喜的影響擴散到香港的相關股份，首先影響中移動(941)，新iPhone平價版無傳聞咁便宜，據內地蘋果官網的訊息顯示，iPhone 5S的16G版售價是5288元人民幣，而iPhone 5C的16G版本售價高達4488元人民幣，僅較貴版低800元人民幣，預期未必會在內地大賣。
蘋果概念股中招
蘋果概念股就中招啦，早前傳蘋果會在發佈會上公佈和中移動攜手在內地推iPhone 5S手機，中移動股價近期持續上升，結果並無公佈，中移動跌0.8%。
iPhone手機製造商仲慘，富智康(2038)大跌4.8%，得番5元；瑞聲科技(2018)亦挫4.2%。電訊股亦無運行，數碼通(315)跌1.6%，和記電訊(215)跌2.7%。
大家要留心，自2008年iPhone 3推出後，智能手機興起，電訊股生晒，因為一片使用3G計劃的熱潮(以至後來4G)，客戶俾多啲月費，電訊商賺多啲。
但從數碼通剛公佈的業績可見，智能手機熱潮的高峰漸過，數碼通公佈截至今年6月底止全年業績，全年純利8.43億元，按年減少17.6%，公司話，由於政策和市場情況不明朗，集團將減少未來的派息比率至60%，以維持審慎的負債水準。
日本城今日招股
數碼通期內總收入上升21%至120.67億元，其中手機及配件銷售上升52%，而服務收入則下跌1%，主要是由於本地流動服務收入的4%增長，被漫遊業務18%的跌幅所抵銷。而3G及4G要增加投資，以應付不斷上升的數據用量，但數據用量增加並未充份反映在收入上，令純利下跌。數碼通今年股價一級級落，真係事出有因。
除了蘋果新iPhone的新聞，市場消息主要係美國可能放棄出兵敍利亞，中東局勢緩和，紐約原油價格回落至近三周低位的每桶107美元水準，石油類股份亦跟住回軟，落後大市。內銀股普遍回軟，「九行」中民生銀行(1988)及中信行(998)靠穩，其餘全部向下，齊跌超過1%。結果恒指23000點得而復失，內地收市後來一個後抽，跌幅收窄至39點，收報22937點；國企指數跑輸恒指，跌60點，收10636點，成交稍減至703億元。
近日新股市場稍為回暖，以「日本城」品牌在本港經營家品店的國際家居零售今日起招股，計劃全球發售2.16億股，每股售價2.22至2.81元，每手1000股，入場費2838.32元。
陸羽仁
上一頁 下一頁
金融High Tea 舊文