金融High Tea 2013年9月2日
金融High Tea——基金也瘋狂
2013年9月2日
最近中石油(857)和同系的昆侖能源(135)發生老總被拉事件，股價大插，雖然昆侖能源在上周三大跌後，在周四、周五都有反彈，但即使上周五上午，仍見大量外資沽盤，基本上係散戶買、基金沽的格局，一般而言這是「唔係幾健康」的狀況。
當天同經紀張傾起，佢問基金沽貨係唔係一定啱呢？我話咁又未必，基金營運受好多限制，特別係見隻股由今年1月高位17.2元，跌到上周三低位10.74元，跌咗37.5%，即使較7月高位14.18元都唔見咗24%，短期跌咁多，唔理好醜都要斬倉。舉一個例，一隻基金如果其中5%貨係昆侖，現價比入貨價低20%，即係等如整個組合減值1%，要知芬佬收入和組合回報掛鈎，隻股再跌，芬佬自己都入肉，唔理好醜都會斬。所以即使基金斬倉，都唔一定判定一隻股死刑，人哋有風險管理啫。
經紀張死要拗，話如果隻股得，坐一排都得啦，使乜亂咁沽。我話人地基金按時報業績，如果年底前唔升，到明年先至升，對芬佬已無意義，所以如果我係佢，都可能會嚴格執行紀律，唔加判斷，所以造成咁多基金盤大手沽昆侖。
潮流基金買唔過
陸羽仁我識唔少基金佬，唔敢唱衰佢哋，因為好多真係好努力研究公司業務，跟得好緊，並且有獨到見解，佢地有時快過公司老闆睇到家公司的問題，因為老闆有偏見，會盲目相信自己家公司無事。
不過，這也不等如散戶買基金好過自己選股。散戶的問題是未必識得揀，股唔識揀，買基金亦唔識揀。市面基金咁多，好似沙裏藏金，散戶多數對個基金做乜、甚至操盤人係乜水均毫無了解，更甚者是對運作基金的公司風格也一無所知，陷入一個盲買的狀態。部份針對散戶的基金公司為了吸客，都係呢排興乜就搞乜基金，潮流興炒商品就做商品基金，興金磚四國就做金磚四國基金，興買債券又做債券基金，基本上唔熱唔搞新基金。我真係識一啲朋友，自命唔識買股，以為買基金「穩陣」(唔知點解有呢個感覺)，上述幾種基金全部買中晒，但每一種熱潮一過，這些投資產品大跌，相關基金都跌到「七個一皮」，我個朋友等如被人「三炒」。
買潮流基金，就如買炒到貴貴的熱門股一樣，是一個買貴貨的陷阱，在熱潮中高價買嘢，係買一個產品類別，而唔係買一家特別有潛質的公司，這是最容易中招的狀況，投資產品有升跌周期，呢期商品升，下期美股升，點會一直升下去？
不過講開基金，我又忍唔住講一個故仔，話說早前我同一個來自內地的公司老闆食飯，佢話第二日要趕住去上海，出席一個生日派對，我話乜人生日咁巴閉要您趕回去？佢話係一個女股神基金經理生日，好多上市老闆都畀面出席，所以佢唔可以唔去。吓，咁多上市公司老闆齊賀一個基金經理生日？咁又代表乜嘢呢？
女股神大擺生日宴
呢個世界每個人都有個利用價值，上市公司老闆咁捧女股神場，當然唔係想追佢，只係畀面派對，成為女股神的「朋友」，做朋友亦唔止係飲食咁簡單，仲有好多跟尾，當然會叫女股神名下基金，入股自己公司。當大家有這一層朋友關係，俗啲講係「老死」，自然易話為，公司老闆會對女股神和盤托出自己的大計，女股神也較易落疊。
不過最後女股神買咗流貨，亦都好容易解釋啦，佢同啲上市公司老闆「太熟」，自然盲目相信對方的故仔，演出一幕又一幕「基金也瘋狂」的故事。
結論係散戶揀基金，都要搵一啲作風嚴謹、管理良好的基金，唔好見熱門概念就買，唔好見明星基金經理就信，要用吓個腦架。
最近同內地高人傾開，佢話內地經濟出現下行風險，再加上亞洲新興國家發生貨幣危機，這反而係好消息，因為令中央高層統一思想，要支持經濟發展，雖然依家不再會出現2008年大放水那種局面，但起碼是集中注意力支持經濟，其中一個例子，是上海的自由貿易區，這個建議得到總理李克強支持，初時高層有不同意見，擔心上海步伐走得太快，但後來經濟形勢惡化，反而統一了意見，令上海自貿區成事。
經濟差局搞自貿區
唔知大家有無留意，內地股市在7、8月強番，其實和上述的轉折有關，特別係上海自貿區拍板後，有關股份自然大炒，唔止和自貿區的概念沾上邊的股份炒起，連離好遠的股份都炒埋，慢慢就令上升股份愈來愈多，成為股市的支持力。
但高人比較看好內房股，主要因為內地經濟缺乏動力，已經到了不能打擊內房業的地步。據國際貨幣基金今年7月對中國經濟所作的報告，目前中央的諸多調控手段已經起到成效；然而，由於房地產佔經濟及就業比重已經超過10%，可能出現的房地產泡沫，仍然是中國經濟的潛在危機之一。
但高人話，泡沫風險在遠，經濟下滑風險在近，中央不能出手再打擊內地樓市，以免再拖低經濟增長。中央最想看到內地房價平穩，開發商繼續投資起樓，帶動經濟與就業。
內房業今年上半年經歷了一個銷售黃金期，按上述不會打壓樓市的思路推想，未來下半年還是有一個比較平穩的政策環境，有利房企賣樓，得唔得就睇你自己，因為信貸供應仍然比較緊張，對借貸比例較高的房企不利。
內房業另一個隱憂是地價上漲，令毛利壓縮，內房行業由暴利時代，慢慢步入製造業的薄利時代。內地《證券時報》分析134家上市房企今年上半年的業績，共實現營業收入2621億元人民幣，按年增長41%；上半年純利316億元，按年增長27%。純利增長與營業額增長不匹配，顯示毛利率下降。134家地產公司，2013年上半年的平均毛利率為35.7%，比去年同期下降了3.7個百分點。
證券時報統計的萬科、保利(119)、中海外(688)、恒大(3333)、招商、金地、碧桂園(2007)、潤地(1109)、世茂(813)、雅居樂(3383)10家龍頭房企中，除了世茂今年上半年毛利率，從去年的34.4%升至35.5%外，其餘9家房企的毛利率均下滑，其中跌幅最大的房企為潤地，該公司上半年毛利率為31.45%，與去年相比下降16.1個百分點，中海外及恒大地產的毛利率，也分別縮水4.5和1.3個百分點。
碧桂園等回吐吸納
大家不要忘記，房企賣樓後要年多兩年交了樓才將利潤入帳，即是話今年上半年利潤下降，只是反映一兩年前賣房時毛利下降的趨勢，由此可以預料未來利潤率下滑的趨勢還會持續；換言之，內房的銷售額上升幅度要較大，才可以彌補或追過利潤率的跌幅，令盈利不致下滑。
不過綜合而言，未來內房股仍可睇好，可以候低吸納。剛看到證券商麥格理的報告，亦有類似觀點，預料內房股未來兩年會跑贏MSCI中國指數逾10%。麥格理相信，由現時至明年3月人大會議前，應沒有更多調控樓市政策出台，各大內房股仍有相當強的增長力，毛利只會輕微收窄，加上資產負債表健康，買地價格亦合理，預計綜合核心盈利增長於2013和2014年分別達28%和25%，相對之下，MSCI中國指數只增長9.7%和9.8%。縱使內房股升幅於過去兩個月達8%，較MSCI中國指數高3個百分點，但按6.1倍市盈率計算，估值仍低，未來12個月的上升空間達33%。
麥格理預測2014年內房股的市盈率、市帳率中位數，分別為5.5倍和0.7倍。年初至今，內房股先跌後升，升幅2%，特別看好世茂房地產、碧桂園、龍湖地產(960)、富力地產(2777)及中國海外；中小企當中看好佳兆業(1638)、合景泰富(1813)、融創中國(1918)；看淡恒盛地產(845)、SOHO中國(410)、恒大地產及瑞安房地產(272)。
我就認為碧桂園雖不俗，只是股價略高，佢一級級咁上，底部由3月的3.35元到6月的3.51元，一步步往上推，現價4.85元貴咗少少，9月大市不明朗，可以放入關注名單，不過要等有較深回吐才好吸納。
陸羽仁
上一頁 下一頁
金融High Tea 舊文