金融High Tea 2013年10月8日
金融High Tea——樓市賭局
2013年10月8日
中環茶友昨日最熱話題，唔係講股，而係講樓，大家焦點係樓市劈價潮係咪真係殺到？
茶友話，早兩日他和個大學講師傾偈，期間講師提起有個舊同事做咗政府智囊，智囊唱得樓市好淡，實牙實齒話三年內樓市必跌三成，若然唔信可以大家賭牙骹。
政府心戰迫發展商減價
講師問智囊點解咁肯定，對方就話香港人買樓係趁墟心態，升就爭住買，跌就無人要，而家樓市畀辣招㩒住，遲啲新供應又出，加上美息會升，個市一旦回調，樓價必然下跌，而且一跌至少跌三成，絕無花假。
茶友聽完大學講師咁講，估計呢啲可能係政府心戰室的招數。地產商賣樓唔夠數，年尾必定要推盤，唔排除政府心戰室呢個時間就跳出嚟唱淡樓價，逼地產商減價。
昨日開市前，就見到有報紙大大隻字賣，話新地(016)九龍站的豪宅盤劈價開售，座中茶友不少是有米之人，大家紛紛收到代理瘋狂呼喚，問劈價盤睇唔睇樓，搞到劈價潮好似打到嚟。
係劈價氣氛下，地產股跌得唔算多，主角新地收102.4元，跌2.7元，其他地產股都跌2%以下，略為跌多過大市。市場?家應該留意減價後的反應，睇下市場有無承接力出現，如果減價去到貨，地產商最多係賺少啲貨如輪轉，對股市影響應該唔大，但如果反應麻麻，即係代表仲有再減壓力，相信地產股仲要再探一探底。
除了本地樓市外，港股消息唔算多，大家都係睇下美國政府的財政爭拗點發展。恒指收市報22974點，跌165點，國企指數挫90點至10427點，大市成交503億元。
美國政客繼續玩嘢，政府繼續關門。不過，市場估計政客唔敢玩得太耐，怕最終導致政府出現違約，收唔到科。美股上周由低位反彈。但杜指期貨收市後持續下滑，而且愈跌愈急，預視美股今晚開市危危哋。
蚊型股掀上市潮
可能係見到美國政客懶懶閒，國基會(IMF)主席拉加德日前發出警告，說美國達成新的債務上限是一件「逼在眉睫之事」，債務違約將導致比2008年經濟危機還要糟糕的局面。歐洲股市昨日早段表現疲弱。外圍股市唔靚仔，港股自然無運行。
生意淡泊，不如賭博。港股近期投資氣氛還算不俗，但藍籌股又睇唔到有乜好炒，資金於是湧去炒新股，博一博。今個星期，新股市場可謂熱氣逼人，除昨日掛牌的耐世特(1316)外，今個星期五，一日內就有6隻新股齊齊上市，非常熱鬧。據統計，6隻新股，集資總額唔夠4.5億，即係話隻隻都係「蚊型股」。
港交所(388)的資料顯示，至9月底共有124家公司在排隊上市，預測第四季公司上市集資額可達400億元，全年望超過1000億元。
不過，經營汽車零件的耐世特可謂生不逢時，撞正大圍環境轉壞，上市即時潛水，以全日最低的2.57元收市，較2.8元招股價低超過8%。唔計手續費，每手1000股帳面蝕230元。
陸羽仁
上一頁 下一頁
金融High Tea 舊文