陸羽仁 BLOG 2013年12月3日
還咭數
2013/12/3 上午 09:41:43
網誌分類: 經濟
美國歐洲及中國公布的11月製造業數據都好過上月及市場預期，反映全球經濟增長動力正在變強。美國11月ISM製造業活動指數更由齥月的56.4大幅攀升至57.3，為2011年4月份以來最高，令市場感到驚訝。另外，美國10月營建開支增長0.8%至9084億美元(年化數字)，好過市場預期的增長0.5%，且遠超9月份的下降了0.3%。
股市玩相反，經濟數據好轉，但在憂慮聯儲局可能因此而提早退市的預期升溫下，股市卻受壓。杜指跌77點至16008點。標普500指數跌5點至1800點。可幸的是杜指及標普500指數都能夠守住16000點及1800點，未有跌穿比較重要的心理關口。事實上，市場的憂慮唔單止反映在股市上，股市恐懼指標VIX指數跳上14點近排的高位，而關鍵的美國10年期息口升上接近2.8厘水平，離分析認為股市會出現大震蕩的2.9警界線愈來愈近，投資者要小心啦。
美國本周五將公布11月非農就業數據，市場普遍認為這份數據將對股市做成較大衝擊，唔少人擔憂，如果數據遠好過預期，將可能促使聯儲局在今個月會議上決定縮減QE，未必會等到此前預期的明年3月。
美國的「黑色星期五」瘋狂購物周末剛過，據美國零售協會的調查顯示，零售銷售成績報喜，較去年增長2.3%至123億美元，網上銷售亦創下佳績，感恩節期間線上銷售金額達到10.06億美元，首度超過10億美元。ING全球品牌基金經理人莊凱倫表示，美國景氣復甦，刺激民眾消費欲望，今年美國首波感恩節銷售告捷，預計歐美聖誕年節消費購物旺季，也將有不錯的成績，亦將支持全球消費相關類股表現。美股比較高，怕收水，感恩節銷售不俗對大市無乜幫助。
對好多人來說，炒股就係想累積財富，甚至發達。CNBC的人氣節目Mad Money的主持人Jim Cramer昨日提出三個幾特別，又好容易做得到的保留財富的策略。第一個係還清卡數。卡數同炒股聽落好似有無乜關係，Cramer指出好多散戶孭了一身卡數進場炒股，佢解釋，這些負債壘壘的散戶就算揀股好叻，長期而言都唔會累積到財富，因為炒股的回報，永遠都追唔到償還信用卡的天價利息。即係話，散戶從股市賺嘅錢基本上全送給了信用卡公司。
其次係必需擁有一份醫療保險，Cramer話，沒有醫療保險的話，就一分錢股票都不要買。原因係投資者隨時會因為一場大病就將所賺的錢一鋪清袋。當奧巴馬的醫改落實後，唔買醫療保險的話，將被罰款，有人寧願受罰都唔買醫療保險，Cramer認為，為了沒有保障而接受罰款，這是白癡行為。
最後一個策略係擁有傷殘保險，概念與擁有醫療保險累差唔多，這可保障投資者唔會因為某些不測事故而抹去了所賺得的財富。Cramer認為一個精明的投資者，無論在日常生活或股場中，都會有識識地將風險減低，買保險就係一個有效的方法。
睇完Cramer的講法，睇番香港的情況，我覺得第一條好啱用，第二、三條有少少用。先講第二三條，買唔買醫療保險，睇你對醫療要求幾高，在美國無醫保醫院真係唔醫，但香港公家醫院基本上係全包，百幾元一天住院費，從盲腸炎到癌症都照醫。但若你對醫療的要求高一點，例如癌症想食標靶藥，呢啲貴藥公家唔包，咁食標靶藥都好易食出過百萬，但若你要求不高，睇公家基本上掂。
傷殘保險當然可買，但出意外傷殘的機會唔太大，外國人人揸車上高速，出車禍意外機會大過香港。
但第一條唔好欠咭數我百分之二百支持。咭數貴者收20厘息，平平地都收10幾厘，試問乜嘢投資每年可穩賺10幾厘? 無。但穩輸10幾厘的行為就係借咭數，你辛苦投資，但借落咭數，結果最好係得個桔，較差是兩邊輸。散戶的問題是以為炒股賺錢好容易，無睇到巴菲特都係一年增長10幾20%就變股神，可知穩定有這個增長之難，但你一年唔見20%息好易。
陸羽仁
回應(6) 我想回應
陸羽仁 BLOG 舊文