陸羽仁 BLOG 2013年12月9日
馴獸師
2013/12/9 上午 09:33:45
網誌分類: 經濟
預測得到就唔係股市啦。投資者等咗幾日美國11月新增非農業就業職位數字，結果揭盅人數較上月增加20.3萬人，遠好過市場預期的18.5萬，失業率為7%，亦低過預期的7.2%。
成個2013年的股市都可以話在憂慮聯儲局退市陰影下去炒，股民行為可以用「好消息當壞消息炒」來總結，投資者每次見到美國經濟數據有好表現，都嚇到腳軟，沽貨沽唔切，但沽完見無事又走番埋嚟，又再炒上。上周，投資者見ADP私營就業數據及首次申領失業數據都好過預期，美股就連跌五日，股票恐指標VIX指數亦跳上超過一個半月高位，就係怕非農業就業數字好觸發退市恐慌。
妙就妙在，上周五公布的美國非農就業連續兩個月增長超過20萬人，失業降至2008年後新低。再加上12月密揭根大學/湯森路透消費者信心指數初值升至7月以來最高的82.5，亦遠好過市場預期的76.5。分析普遍估計美股周五唔慌會有好景，點止又一次跌曬眼鏡，美股不但唔跌，杜指更大升199點至16020點，收復萬六點大關；標普500指數亦大漲20點，收報1805點，重上1800點樓上。大家都以為勢必飆升的美國10年期國債收益率亦不為所動，保持2.87厘。
唔通市場上周五忽然轉性，就算聯儲局退市，都唔沽貨？又或者，踏入2014年，投資者已經唔再好似2013年咁憂慮退市呢？
上周五股市的「反常」表現，對於活躍的投資者來說，的確好困惑，因為他們的投資策略都建基在聯儲局退市將對股市造成壓力的理念上面。
難道這個理念已經改變了？美股上周五的表現是否已經證明了股市強勢已經足以頂得住退市引發的下行壓力？
如果睇番10月非農就業數據又係意外地增長20.4萬人，股市當日亦不跌反升，雖然幾日後又跌番。再睇美國國債市場對經濟數據做出反應，10年期國債息因為美國經濟有改善怕退市，由10月底的2.5厘升至目前的2.87厘，市場現時普遍認為聯儲局一月會退市，相對由5月的1.5厘抽升至9月時的3厘的升幅。債市10月的反應已顯得較溫和。可見債市都係正適應退市的現實，股市睇住債息走，債市反應唔大，股市就照炒。
有交易員認為，聯儲局退市涉及兩個問題，亦直接影響投資者的反應，第一係何時退市及退市的幅度；第二係聯儲局新一任主席耶倫如何將退市與收緊寬鬆政策這個死結打開。
首先，以高盛及柏克萊為主的分析員指出，非農就業增長20萬人，卻仍然未足以說服聯儲局提早啟動退市，因此預計聯儲局不會於明年三月前作出決定。部份分析員包括瑞銀睇得早啲，認為聯儲局最快都要明年一月作決定。
花旗銀行的分析員Steven Englander則認為，對股市造成最大影響的可能唔係幾時退市，而係退市的幅度。增長20萬人反映就業市場有改善，但未算太強，聯儲局即使退市，都唔敢太進取。
至於第二個問題，市場估計耶倫將會想方設法說服市場「退市唔等如收緊寬鬆政策」，最多分析估計的是將聯儲局此前訂定的加息門檻由現時的失業率6.5%，降至6%。
聯儲局最唔想一退市搞到債息上得太快，打擊經濟復甦，所以而家做緊馴獸師，說服市場習慣退市影響唔大，唔好做過大反應，到市場習慣了，反而就到了開始退市的時候。即係話一話驚退市債息急抽上3厘幾時唔會退市，講來講去無乜反應時就差唔多開始了。
陸羽仁
回應(5) 我想回應
陸羽仁 BLOG 舊文