金融High Tea 2013年12月6日
趁年尾搵食
2013年12月06日
全球股市一個重點，係周末美國公佈的就業數據。聯邦儲備局選出新主席耶倫後，擺出一隻「善良的鴿」姿態，問題係美國不斷放水，始終會有壓力，特別係反對者批評量寬根本唔能夠推動金融機構放寬對中小企借貸，呢啲聲音對聯儲局不無壓力，故此市場仍然關注美國幾時會停止買債。
耶倫對銀根採取寬鬆政策的態度，係推動美股上破歷史新高的動力，但要留意係央行要保持量寬之餘，市場已逐步提高對息口向上的戒心，故此近日債息維持係接近2.8厘的高位唔肯回落。從壞的一方面嚟講，係市場認為美國收水機會仲係好高；從好的一方面嚟講，就係衝擊已在慢慢消化。睇通咗呢點，美國就業數據短期或者會對市況有衝擊，長遠嚟講影響就唔係咁大，因為債息市場已經話咗俾我哋聽收水的大方向。
股仔炒到飛起
從港股角度嚟睇，今個星期恒指以調整消化為主，但有感覺係基金大戶先在月初唞氣，等候機會年尾做靚盤數分水，所以基金係有秩序沽貨，但幾類重磅中資股仲係守得好穩，而且個別股仔炒到飛起，大家趁年尾搵食的味道甚濃。
雖然港股三連跌，但尾市情況唔係咁差。前一晚歐美股市低收，港股低開94點報23634，在A股下跌拖累下一度挫165點低見23563，午後借全國城鎮化工作會議的時間已經確定或將於月中上旬召開反彈，尾段曾倒升不足1點，最終微跌收市。恒指收報23712，跌16點；國企指數收報11395，升26點，成交金額596億元。藍籌股以匯控(005) 跌1.2元表現最差，收報84.2元。
銀行業唔易做，大銀行跟隨大市腳軟，再度跑輸大市。渣打(2888) 跌得仲傷過匯控(005) ，大跌4.7%，收174.1元，主因瑞信發研究報告，指渣打各領域業務表現疲弱，預計全年收入按年大致持平，成本及減值均增加。該行估算渣打2013財年的核心除稅前盈利跌7%，差過預期的74.5億美元，重申渣打「跑輸大市」投資評級，目標價維持171.71元。
銀行股同人唔同命
相反，本地二線銀行因為競爭劇烈，唔易維持落去，引發賣盤而備受追捧，永亨銀行(302) 收購戰進入直路，同係銀行小股東，但同人就唔同命嘞。據報道，迄今共有四大買家參戰，包括農業銀行(1288) 、安邦保險(放心保)、新加坡華僑銀行及加拿大豐業銀行。預計將於本月中出價，全面收購價最高達450億元，每股逾146元，以永亨昨日118.4元計，溢價接近24%。報道指，永亨截至6月底的每股資產淨值約66.39元，市帳率2.2倍，為市場預期上限。競購者收購永亨目的在於銳意擴展亞洲及海外業務，尤其睇中香港係人民幣最大的離岸中心地位。
永亨年中開始傳出賣盤消息，股價由75元炒上，唔夠五個月，股價飆升近六成，認真和味。同樣可能成為併購對象的大新銀行(2356) 其間大幅進帳超過三成，同系大新金融(440) 都有23%升幅。
如果永亨併購年內落實，加上越秀集團斥資116.4億元收購創興銀行(1111) 最多75%股份，今年內有兩間港資銀行成功賣盤，小股東齊齊收份聖誕大禮物。
陸羽仁
金融High Tea 舊文