金融High Tea 2014年1月21日
金融股咪貪平
2014年01月21日
內地再爆水緊潮，上海同業隔夜及一周拆息昨日分別大升過百點子，成為中港股市疲弱的元兇，中資金融股更「無運行」。陸羽仁去年第四季起叫人避開中資金融股，睇嚟呢個建議繼續有效。
四大國有銀行昨日全面向下，中行(3988) 跌0.9%，收報3.36元，已是最叻仔；兩大龍頭建行(939) 及工行(1398) 分別挫1.82%及2.05%。內險股表現同樣差勁，平保(2318) 挫2.6%，報67元，係內險股中最弱，以此股咁嘅表現，似乎都唔好貪平博反彈，呢個亦係炒大型金融股的基本原則。
水緊唔似會鬆
中央整頓銀行的決心無放鬆跡象，睇嚟春節前，就算人行放水都只係救急為主，主調都係從緊，投資者慢慢已唔期望會有大舉放水行動。
昨日內地公佈的第四季度經濟增長數據符合市場預測，恒生指數跌幅曾大幅縮減至44點，早市收市仍企於23000關上。惟午後內地股市跌幅擴大，上證指數失守2000大關，大市最多跌249點，最終收報22928，跌204點，相信上落市仍然會維持。
市場近日開始留意手機股，冷門股酷派(2369) 的智能手機熱賣，股價借勢大炒。雖然大市急回，但酷派昨日跌唔落，全日仍升2.15%，收報3.8元，龍頭股聯想(992) 都逆市企穩，升1.39%。智能手機已成趨勢，加上4G服務推出，帶動內地出現換機潮，一眾手機零部件商昨日炒上，智能手機電子元件供應商時捷(1184) 勁升11%，睇嚟手機股仲有一陣熱鬧。
恒盛私有出手低
在昨日10大跌幅股份中，排第一係恒盛地產(845) 。大股東早前宣佈私有化恒盛，雖然有基金股東支持，但由於數人頭不夠數，被出席者否決議案。中環茶友中有上市時認購坐艇者，聽見私有化失敗股價大跌，反應竟然相當平靜，理由係大股東出手太低，出價根本唔吸引，佢都唔介意坐多陣，甚至預咗有人「玩嘢」，出來質低股價或搞抽水𠻹。
今次基金贊成、小股民反對「搞彎」咗個收購，有人話同數人頭制度有關，茶友話首先要問大股東出價，係咪對得住小股東先？佢舉咗小小超李澤楷旗下幾家公司私有化為例。佢話，小小超最鍾意玩財技，電盈(008) 係2000年後股價大跌。後來公司建議私有化，被人否決後股價長期無乜起色，點解呢？皆因電盈係2000年狂升係泡沫的結果，爆咗之後大跌先係反映真正價值，小股東唔肯賣，唔代表股價可以升番。
陸羽仁
金融High Tea 舊文