金融High Tea 2014年2月10日
增值險中求
2014年02月10日
股票跌得多曉得彈，港股上周五升213點，終於有個似樣少少的反彈。當晚美股大升1%，杜指升165點。港股在美國預託證券收市價比港股上周五收市升110點，預計今天港股仲有得反彈。
美股暫守上升軌
上周五最受注意的是美國公佈的就業數據，美國勞工部公佈，美國1月非農就業職位增加11.3萬個，遠低於市場原本預期的18.5萬個，而對上一個月12月非農業就業職位增幅，也只是向上修訂1000個至7.5萬個，市場本來也預計早前公佈的12月數字咁低，最終會大幅上調，結果只是上調1000個職位咁大把。但美國1月失業率就由前一個月的6.7%再降至6.6%，觸及5年新低，只是略高於聯儲局設定會考慮加息的6.5%門檻。
在就業報告公佈後，美股期貨一度插水，但隨即快速反彈。市場分析認為，考慮到寒冷天氣的短期影響，撇除這個因素後，就業報告要遠比表面看來更好。聯儲局理事費舍爾亦有類似看法，1月和12月就業情況受到寒冷天氣的重大影響，淡化了職位增長疲弱資料的份量。
港股走勢是美股加內地股的綜合體。過去幾年美股升，內地股跌，所以港股橫行，只要美股守得住向上走勢，香港就唔會係一個跌市，維持做上落市。你睇美股個一年圖(見附圖)，美股從早前低位強勁反彈，上個低位仲守到1年的上升軌，若未來幾日美股向番上，咁美股就會定番。唔好以為美股唔關香港事，若美股不斷穿位向下，睇港股低位亦要向下移，例如本來預佢在20000點至25000點中間走，見美股破位向下時，就唔好死牛一邊頸唔變啦。
過年期間和一位包拗頸的朋友飲茶，就講起馬年這個20000點至25000點的可能波幅，包拗頸朋友就問，點解一定唔會見19000、18000點，甚至更低？這個朋友的講法是將命題轉移，我無話「一定唔會」跌穿20000點，只是現時看以一年計，若在2月反彈完再下跌，較大機會在20000點附近找到支持，若然重要假設有變，例如退市令美股破位不斷向下，港股當然有可能同樣向下穿位啦。
拗頸朋友亦唔係唔識嘢，佢有佢睇法，佢話恒指成份股中部份如騰訊(700) 和銀娛(027) 升得太高，其他如好多內銀雖然只有5、6倍PE，如果佢哋盈利跌一半，都超過10倍PE，所以內銀仲可以大跌㗎。
佢亦講到一個唔想輸的心理，若果20000點買咗，個市跌到19000點，佢會好唔開心，所以一定等跌得好殘先至入市。
「星期日睇報紙」理論
我問佢過往買唔買到底價，佢話買到㗎，我再問買到幾多，佢話好少，通常唔敢買得多。佢係年薪過百萬人士，銀行存款以百萬計，以往咁樣等底價買，只買到10萬、8萬元股票。我以一年波幅20%計，即係佢賺2萬，以買股回報率計好似好多，但以佢可以投資的銀碼計，我又覺得佢買得太少。當然佢只是唔贏，但無輸，已經好過好多亂炒輸好多的人。
但我覺得佢可以冒多少少風險。關鍵在於佢放大了即時危險，美國著名基金投資者彼得林治有個「星期日睇報紙」理論，美國的周末版報紙好厚，做好多專題，財經專題好多都係好誇張，講呢種危機嗰種危機，佢認為睇完你乜股票都唔使買，但事實上大部份危機不會發生，會發生的危機也多數不在那年發生，可能幾年後才發生，買完沽咗危機都未出現，彼得林治就認為不要過份誇大風險。
好似我呢個包拗頸朋友怕內銀盈利跌一半的講法為例，中國要搞利率市場化，唔想銀行咁壟斷窒礙經濟，有條件地開放銀行業競爭，例如畀外資銀行在上海自貿區開分行，開放競爭係一個大方向，長遠內銀前景一定唔可以盲目看好，所以我都開始唔推介你買內銀做長線投資，即係買咗放埋唔理，或者月供諗住買佢10年那一種，都不宜買一個由壟斷到開放的行業(其實中移動(941) 已經係一個先例，開放競爭令佢利潤和股價不前)，問題係內銀盈利會唔會好快跌一半？
內銀盈利跌一半前，先要盈利唔增長，佢哋增長放慢是事實，今個月底下個月初佢哋派成績表可以睇到多啲，但未似盈利會馬上大跌。如果內銀盈利有少少增長，股價不至於大跌，應該維持呆滯局面，咁佢只係拖住指數唔上，唔至於大插。
所以今年港股會唔會大破去年19500點的低位，關鍵應不是內銀大跌，而是由美國收水帶來的變局，包括美國股市會否由升市變成跌市，以及包括中國在內的新興市場股市會否不斷穿底，如果外圍衰過舊年，港股就會穿底，若然美國保持升勢，港股又唔會死得。
我那個包拗頸朋友是承受風險太少，而不是一般散戶那樣承受風險太多，佢可以買50萬股票，為了捕捉那一個真正的底部，結果只買了10萬，即使這10萬元股票一年賺20%即是2萬，以50萬可投資的錢計只有4%回報(因為其他錢放銀行接近無息)。我建議佢分三注，在跌近20500點先買一注指數基金，19500點再買一注，18500點再入最後一注，三注入齊平均價19500點，無跌咁多入唔齊三注睇環境決定再唔再追，相反入齊三注後跌得更多，應該都唔會跌得太離譜，指數股衰咗有得守，又有近3厘息，好過放銀行，係有風險，但風險都可以控制。記住分段入市係一個預定的策略，不等如衰咗溝淡，我從來不贊成溝淡，認為贏時可以谷，輸就縮，而唔係加注。
從買指數股開始
有些散戶太勇，唔識風險；有啲散戶太乖，接近完全唔冒險。唔好望一朝富貴，散戶以為富貴險中求，搏命用全副身家去買仙股或超高價股份，風險太高，一衰就輸身家。但倒過來說，即使你想增值，都唔可以完全唔冒險，問題是如何冒可以控制的風險。
後生仔、中年人、老年人，可以冒的風險不同，後生仔做嘢幾年有10萬元，全部攞去博，輸錢可以再來過。中年人有100萬身家，同樣咁博，輸清好難搵得番，所以可以將財富分類，一部份買有租收的物業睇長線，一部份買股票，而且要較多買大股，唔好炒咁多仙股。老年人有幾百萬退休金，若然攞去炒股，輸晒點算？我唔係作大，我真係有個朋友，佢係高級公務員，仲有5年退休，之前炒股已輸咗大部份身家，樓亦輸清，家返去同父母住居屋。佢仲話畀我聽，佢等退休攞大筆退休金，然後去炒股重新博過，我心諗，佢過去炒股往績咁差，攞筆退休金去博，輸晒點算？在現今轉得咁快的社會，你以為好穩陣，2000年買8號仔都可以唔見一大半，炒股那有保險？
我上面呢段話，同之前叫人冒險好似相反咁，我只係想講唔同年齡、唔同性格的人，我畀佢的投資建議好唔同，想資產增值，一定要冒一啲風險，但風險要可控，年紀愈大，愈不應該冒自己不能控制的風險。唔識揀股，可以從研究指數股走勢開始。
陸羽仁
金融High Tea 舊文