金融High Tea 2014年2月6日
有花須折
2014年02月06日
美股杜指周二回升72點，刺激港股昨日早段一度反彈，恒生指數高開167點見21564，好可惜已是全日高位所在，大市彈完即散，午後更在濠賭股急瀉的拖累下，最多跌200點低見21197。尾市跌勢略見放緩，恒指全日收報21269，跌128點，國企指數表現較佳，跌39點收報9470，大市成交金額則由周二的755億元縮減至653.6億元。
濠賭股成為昨日跌市重災區，皆因澳門公佈1月份博彩業收入按月下跌14%至287.39億澳門元，遜於預期，觸發濠賭股全面下挫，散水味道十足。龍頭金沙中國(1928) 跌得最甘，大插7.45%報54.65元；銀河娛樂(027) 失守70元大關，收報66.25元，瀉7.34%；新濠博亞(6883) 跌2.39%，跌幅已是最輕微，但收市失守百元大關，報99.95元。
另外，值得留意酷派(2369) 繼續逆市走高。高盛發報告唱好，將酷派評級由「中性」上調至「買入」，並將之納入「確信買入」名單，昨日最多升9.48%見4.85元，創逾三年新高，收報4.64元，仍升4.74%，大有上試5元之勢。
福地香港 吸引資金
農曆新年與股市大哥賀年，乘機請教一吓今年股市，大哥坦言今年是個亂局，亂源是來自北方。細問原因，他說內地反貪，風頭未止，過年之後有可能又來一波，現在傳言被相中調查者，不少都是大老虎。咁環境當然不利股市，但正因為上面形勢麻麻，好多資金都想外出，傳言內地首富級的內房商，都積極調動資金，準備加強海外投資，實行買重保險，假如資金外逃，有可能會以香港作為中途站，香港向來是福地，四周生亂，有時反而吸引資金落腳，至於今次會否靈驗，家都仲難講，但以佢多年市場打滾經驗，投資幾時都係要做好最好準備，寧願見到情況比想像中好，先加重注碼追擊好過。
盈利下跌 地產難撈
大哥本身沾手幾個最賺錢的行頭，零售、地產、博彩都有賺。他坦言，蛇年幾個行頭有轉勢跡象，先係零售受內地提倡節儉，影響高檔消費，曾幾何時生意最好的銅鑼灣、尖沙咀黃金地段，豪客都少咗，家做零售如果有人仲話賺緊大錢，咁佢梗係想呃你入局。
地產行業都有啲相似，政府推出咗雙辣招後，發展商要賣樓，就要立印花稅去吸引買家，咁樣做買家無買到平地，啲錢只係益咗政府，但發展商無形中就加多咗好大負擔，咁搞法賺嘅錢少咗好多，家發展商賣嘅樓好多仲係高價買入的地皮，係建築成本高昂，地價未減之下，邊際利潤必然急跌，他估計今年發展商股票好多盈利都面對下跌的威脅，短期難寄厚望。
咁多行之中，博彩算係好做的生意，大哥笑言，自己投資係澳門，發夢無諗過咁好賺，見到人家幾年間變身千億富豪，確係又羡又妒，同時慶幸自己無錯過呢班黃金列車。賺到笑之餘，佢無被勝利沖昏頭腦，話見到過年前濠賭股咁升法，跟住幾隻大股出現股價試頂跡象，佢都開始打醒精神，留意喺乜嘢時候可以「骨吓水」。
覺得夠數 先計吓數
大哥話，佢留意濠賭龍頭股猛升猛升，股價竟然升到同和黃(013) 市值不遑多讓，和黃係多個國家經營百業，又超市又電訊，好多都係同民生息息相關嘅業務，佢做埋做埋咁多嘢，都係同間博彩公司市值差不多，不禁令佢要問吓，究竟係和黃偏低、抑或濠賭股偏高呢？
作為業內人，大哥當然看好前景，但佢同時覺得，家濠賭股去到幾十倍市盈率，以澳門現時接待能力，已經去得好盡，未來要滿足咁嘅市盈率要求出現的高增長，的確係唔容易。家澳門新公佈的博彩數字麻麻，結果就跌番一舖勁嘅，如果錯失咗「骨水」時機，咁就會好無癮，自己行走江湖咁耐，明白有花堪折直須折，須知錢係唔可以賺盡嘅，既然覺得夠數，適當時間都要諗吓係咪要計計數先！
陸羽仁
金融High Tea 舊文