金融High Tea 2014年3月10日
全民炒騰訊
2014年03月10日
美股不斷創新高，但港股乏善足陳，恒指上年收報23306點，到今年過咗兩個幾月，恒指得番22660點，今年來跌咗2.8%。日日在市場打滾，會覺得好多藍籌股都好廢，只係炒騰訊(700) 一隻。
睇真呢個講法又唔係好過份，目前對恒生指數影響最大的成份股是匯豐控股(005，佔恒指15%)，佢今年至今跌3.4%；佔恒指比重第二大的建設銀行(939，佔6.72%)，今年至今跌幅高達10%；佔恒指比重第三位的中國移動(941，佔比重6.68%)，今年至今跌8.7%；佔比重第四的工商銀行(1398，佔比重6.08%)，今年至今跌12.6%。恒指頭四位隻隻跌，特別係內銀股，更係跌到阿媽都唔認得。
其實紅色股整體好唔掂，恒生H股指數基金(2828) 今年至今跌咗10.2%，雖然未穿1月低位，但係都差唔遠啦。
不過有一隻係例外，就係佔恒指比重第五位的騰訊，佢佔恒指約5.3%，去年收市價494.6元，家630.5元，今年來大升27.4%，簡直係「單天保至尊」，單係佢一隻股已推高恒指1.5%，若果唔係有騰訊咁樣大升托住個指數，恒指仲樣衰。另外銀娛(027) 今年至今升咗8.7%；和黃(013) 今年來升4.4%，都有幫吓手抬高咗恒指少少，但影響遠不如騰訊咁大啦，因為騰訊又大隻又升得多，所以有左右大局的作用。
冰火股市 輸多贏少
我們正經歷冰火五重天的股市，騰訊是火，內銀是冰，甚至廣義少少去講，港股整體都相當冰。藍籌當中，買唔中騰訊、銀娛、和黃、金沙(1928) ，就輸多贏少，好易損手㗎啦。1月股市大跌後反彈，如今恒指繼續彈向較高位置，但散戶黑起上來，在1月低位時撈咗內銀，當反彈時無食胡，家佢哋反彈都完晒，差唔多又去番1月低位，走慢啲真係喊都無謂。
內銀咁弱，係衰三瓣，首先衰中國經濟放慢的大環境；其次衰長線中國銀行業要開放競爭；第三係內地互聯網巨企已冒起搶生意，特別是第三點最受關注。
現時互聯網對銀行業的挑戰，集中體現在阿里巴巴的「餘額寶」上，它於2013年中期成立，擴張快速，皆因阿里巴巴本身有廣泛的客戶基礎，當然更重要的原因，是餘額寶的回報率比銀行活期存款吸引，所以餘額寶的規模快速增長，去年底已達到1853億元人民幣。
今年2月份，餘額寶的規模已經增長到約4000億，中金公司估計，在今年內餘額寶會增至6000億元，到2016年能達到1.5萬億；與此同時，其他互聯網公司也推出類似金融產品，這些產品通過銷售貨幣市場基金為客戶提供回報，令內地貨幣市場基金亦快速增長。
中金公司更預測，互聯網公司推出的餘額寶類型產品，本質上推動了銀行活期存款的利率市場化，打亂了中央本來推進銀行業競爭、先令定期存款利率市場化、然後再把活期存款利率市場化的戰略部署，加快了利率市場化的進程。
網上金融 不利內銀
值得注意的是，銀行面對存款客戶流失，紛紛推出貨幣基金產品去應對，想把活期存款留住，加劇了銀行之間的競爭。根據美國的經驗，在利率市場化過程中，貨幣市場基金曾經達到存款的20%至60%。中金估算，3年內貨幣市場基金能替代8個百分點的儲蓄存款，將降低銀行淨息差約14至15個基點，影響內銀純利約8%。
阿里巴巴的餘額寶衝擊力大，阿爺口頭說十分關注，但不見得會拿出甚麼手段來控制，這就令內銀投資者心驚，其他互聯網巨頭自然唔執輸大力去搞，例如內地最大搜索網站百度，就推出餘額寶同類的「百發」，百度仲話要申請埋民營銀行牌照。照咁趨勢，網上理財工具衝擊內銀生意方興未艾。雖然如中金所估，3年內影響內銀純利8%，數字唔算太大，但心理影響很大。所以小心內銀股在2、3月反彈市無得升，到五窮六絕時仲要跟人跌再尋底。
目標股價 有隨意性
鏡頭一轉，講吓如入無人之境的騰訊，佢今年升咗27%，再睇前啲，佢嚿年6月先至300元，如今630元，1年唔夠升1倍都唔止，真係睇淡者死。騰訊現時1.18萬億市值，高達72.65倍歷史市盈率，講基本因素已解釋不到股價，只是炒作一個未來的夢想。
股票炒緊，證券商唯有鬥牛，暫時最牛係野村，佢給予騰訊的目標價高達750元，相當於2015年預測市盈率36倍(每股盈利21元)，以及2015至2018年間每股盈利的年均複合利潤增長率28%。講真，到2018年，都唔知科技世界變成點啦，所以預測騰訊能長勝到2018年，真係靠估成份好重。不過證券商唔可以出個報告，話推介只因為騰訊當炒，所以點都會整啲數字出來講吓。
舉個例，我做分析員想出位，就同老闆講我睇騰訊見1000元，相當於2015年預測市盈率47.6倍。老闆話我都好想出位，但呢個市盈率好似貴咗少少喎。我就回應話唔怕唔怕，我估高啲佢盈利，估佢2015年每股盈利係28元(好意頭嘛)，咁預測市盈率都係36倍。咁老闆話正呀去馬啦，出報告。萬一我一棍中咗，騰訊1年內真係升到1000元，我就係最佳分析員啦。唔到，甚至插埋水，係衰咗，但反正家家大行都裁員，本來都會死，不如博一博啦。
再分析騰訊點解愈升愈有，呢個都可以話係良性循環，第一大因素如今的確係網絡時代，美國都係大炒網股，我嚿年7、8月在網誌答網友問題時都講過，科網股中線睇好，但蘋果唔得，facebook可炒，扮大戶的策略可以「沽蘋果、買facebook」，因為一隻生意睇淡、一隻睇好，咁一沽一揸可以話係市場中性策略(即係唔理大市升跌都得，不過呢啲策略散戶較難做)，當時蘋果大約450美元，facebook 35美元；如今蘋果530美元，比當時升咗18%，facebook如今69.8美元，升咗1倍，一加一減執80%以上。
輪場主力 一網成擒
呢個故事見到，個別公司的業績前景好壞，的確左右到股價，但係業績好少少的網股，又真係炒到飛起。香港騰訊係咁，美國的網股亦如是。
第二個因素比較技術性，一個股市總要搵啲嘢炒吓，香港就炒騰訊啦。本地股市死氣沉沉，唔係咁好景，但本地外資行雲集，唔通個市呆就唔開工咩，點都要搵啲嘢做，好似窩輪市場，就造吓隻騰訊啦，唔係炒騰訊托市，係無嘢好做就搵騰訊來炒吓。
騰訊長升長有，短線買佢啲輪會贏錢，吸引大批散戶入市，騰訊輪亦愈炒愈勁，愈發愈多。有些時候單係一隻騰訊的窩輪成交，就可以多過恒指輪的成交，可見騰訊輪的熱度。輪商發咁多騰訊輪，要買入正股作「動態對沖」以分散風險，愈升得高要買多啲股去對沖，咁就造成一個推升騰訊的動力。
但我亦睇得比較陰謀論，騰訊自去年中起步飛升，若係咁一直升到2018年，咁幾年一路買騰訊認購輪的散戶，買親都贏，咁咪發大達？有人贏都要有人輸，即係發行窩輪的大行輸啦，連輸幾年要炒多幾個輪王輪后魷魚先至掂？所以一隻大股愈升愈有，又發咁多輪，好似滾雪球咁，唔可以滾幾年咁長，滾一年零就要爆一鑊，要散戶一網成擒，要殺番散戶一轉先至掂。
所以唔好講炒到2018年啦，一直升唔跌炒到2015年都唔易。結論係見到騰訊升很好快好急時，大家就要執生啦，同時手持科網股炒倉，都要控制住數量或持貨時間，咪畀騰訊爆落嚟時炸傷埋自己呀。
陸羽仁
金融High Tea 舊文