異動空間：安全快捷炒股法 - 魏力
市況極為飄忽，無焦點、無主題；跌唔落、彈唔起，典型陰乾格局。日日望住個市，總想搵啲世藝，炒幾格上落，當搵餐晏仔都好，這種想法十分正常。不過，個市冇趨勢，入市如在荒山野嶺蕩失路，心急想摸黑搵出路，分分鐘仲易受傷，更會越走越遠。僥倖賺到個晏，自然頭腦發熱，想贏埋個晚餐，但今次買大開細，連本來到手的午餐都冇埋。心急想追番盒飯，思維自然非理性，連值博率一般的股仔都照衝，結果又中伏，早餐也「被消失」了。悶市之下，唔少「好戰分子」就是如此消耗子彈，令利潤逐步被蠶食。其實等天光先行出樹林，既安全，又快捷，即使捱凍亦總好過受傷及擔驚受怕。仍要蒙眼亂衝的話，只是用錢買刺激而已，目的並非賺錢。
熔盛重工(1101)本周公佈，向Vogel Holding Group(VHG)發10億元可換股債券，換股價1.07元。據《21世紀網》查冊資料顯示，VHG與民行(1988)主要股東史玉柱的關聯公司同名，是史玉柱女兒史靜名下的離岸公司。有猛人加盟，股價近日靜雞雞炒上，成交配合增加，短線可望挑戰52周高位1.56元。
魏力
http://www.facebook.com/2012jason
上一則: 何車500：天津港趁低收集 - 何車
下一則: 青心直說：命懸一人企業 - 胡孟青
異動空間 - 魏力 舊文