魚樂無窮：尋找下隻高危零售股 - 唐牛
■五一黃金周期間，I.T各店「立減」促銷，但恐怕今年業績亦難言樂觀。資料圖片
零售股可謂近期最不被包容嘅板塊，無他，五一黃金周威力大不如前，多隻零售股由天堂跌落凡間︰化妝品雙雄莎莎(178)及卓悅(653)五一假期同店銷售齊齊下跌，前者兩日股價喪跌14%，後者亦創近一年新低。禍不單行的是，不少難兄難弟為差劣業績自我引爆，當中包括佐丹奴(709)及先施錶行(444)。佐丹奴上周率先放榜，首季銷售、毛利率、同店銷售全線回落，用寒冬嚟形容絕不為過。
究竟零售股幾時可以翻身？金飾、化妝、服裝、珠寶鐘錶以至收租股，分別於2011年起陸續見頂。中港矛盾日深，本地人對強國人反感，強國人亦開始抗拒來港。姑勿論誰是誰非，眾多零售股肯定首當其衝，由光速轉為龜速，係未來業績嘅主旋律。其實零售板塊當今的困局，與內地資源股有點相似︰當年阿爺四萬億救市，各行各業胡亂擴張，其後收水令一出，產能過剩問題表露無遺，從內地PPI連續26個月出現負增長可見一斑。可以預示零售股同資源股一樣，已經進入有反彈冇升幅嘅狀態。
I.T中期盈利喪跌
咁邊隻零售股最高危？潮人品牌I.T(999)乃不二之選。睇番公司截至8月底止中期業績，期內盈利喪跌77%至2,806萬銀，上一年度全年盈利達3.8億銀，即係下半年要賺3.5億銀，業績先可以持平，難度高過利物浦數紐卡素13球，盈警不過係遲早問題，現價年度化市盈率高達43倍，下跌空間可想而知，有貨請速逃。
唐牛
上一則: Follow Me：信奉價值投資買魏橋 - 高彰坡
下一則: 股場放大鏡：長建攻守兼備諗得過 - 歐陽風
魚樂無窮 - 唐牛 舊文