魚樂無窮：中外運發威坐五望六
■趙滬湘任主席的中外運圖表走勢靚絕，股價有機會坐五望六。資料圖片
恒指雖於23000大關徘徊，成交亦維持低水平，但個股炒風漸濃，近日推介亦有不錯表現，先跟進一下︰億和(838)回氣一日後，噚日按捺不住再升近4%，新升浪已成，繼續睇兩蚊樓上；中滔環保(1363)尾市發力，收市創兩個月高，睇下今次能否衝破橫行區，如果再一次回落，宜先食一半。金蝶(268)圓底炒上，正挑戰頸線阻力，破位可見3元。其餘利信達(738)及利亞零售(831)慢火煎魚格，有貨者要畀少少耐性。
今日推介中外運(598)，圖表走勢贏曬︰噚日成功突破旗形，日線圖呈45度角上升，由2008年計起嘅月線圖，亦造出大圓底，短中長線指標全部正到冇朋友，坐五望六格。
睇基本因素亦高幾班，首季盈利按年勁升71%至2.5億銀，動力指數爆曬燈。電子商貿日益重要，公司嘅貨運代理、船務代理、倉儲及碼頭服務、快遞服務等，開正網購嗰瓣，前景一片大好。
憧憬注資估值便宜
另一方面，母公司手頭上有大量物流業務等住注入公司，成為物流上市旗艦指日可待，值得加分。咁究竟幾時鬱手？公司近日發行10億人仔債券，話唔定就係注資嘅前期工作！
大和日前發表研究報告，維持中外運買入評級，目標價更大幅調高44%至5.2元，較現價4.7元，有11%潛在升幅，屆時彭博綜合券商預測市盈率僅16.4倍，較同業嘉里物流(636)仍有近兩成折讓！
唐牛
https://www.facebook.com/tongcow88
【壹錘定音】星期一至五，早上8點開咪！
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp
唐牛
魚樂無窮 - 唐牛 舊文