跟四叔?
2014/6/5 上午 09:45:02
網誌分類: 經濟
市場等待歐洲央行今日可能有刺激經濟措施出台，聯儲局亦會公布經濟景氣狀況褐皮書報告。美股走勢一如過去兩日，波瀾不興，窄幅橫行到尾。杜指微升7點，收報16730點；標普500指數漲3點至1927點；納指升16點，收報4250點。
連續三日，美股維持窄幅橫行格局，交投亦冷冷清清。紐交所昨日成交只5.79億股，遠低過7億股的長期平均成交量。
市場觀望味道濃厚，主要原因係投資者估計歐洲央行今天將會公布刺激經濟措施去緩和通貨緊縮風險。至於歐央行會出什麼招數，仍未有明確消息，但市場預期減息，以及推出類似美國聯儲局購買資產的計劃。不過，由於歐央行主席德拉吉(Mario Draghi)的貨幣政策取向向來都是反寬鬆多於寬鬆的，所以對歐洲央行是否真的推出寬鬆的政策，市場仍然半信半疑。另外，聯儲局昨日午後公布經濟景氣狀況褐皮書報告，在此之前，投資者亦唔敢落注。
恒地(012)主席李兆基再講買地產股回報好過買樓，佢昨日在煤氣(004)
股東會後被記者問到投資心得，四叔無托踭，再講投資心得，話手上若有1,000萬元閒錢，會選擇買股，因買樓收租，兩年後增長好少。但本地「地產股股價較資產淨值折讓大，若果拆骨嚟買，股價會多個開(升一倍)，好着數。」 四叔早兩年似乎已睇樓價差唔多到頂，所以發表「買股好過買樓」的言論，佢在前年5月底第一次咁講，當時恒地34元，由當日直至昨日收市50.2元，恒地股價累升48%，不過同基恒生地產股指數累計只升25%，另外反映樓價的中原城市領先指數(CCL)過去兩年僅升15%。表面睇跟四叔買恒基跑出。
不過跟四叔買要快手，因為佢之後不斷講，恒地股價不斷升，第一次講完半年後，到2013年1月恒地已升上53.8元的高位，之後插番落嚟，如果手慢啲在50元樓上先至買，就一直蟹咗，到近期小陽春先至上番水面。
恒地現價市帳率0.61倍，即係股價較資產淨值有39%折讓，不過大家唔好唔知，地產係長期有折讓，真係要分拆上市至反映。所以我話跟四叔都唔好盲目跟，40元時無買，無理由等到51元買啦，等恒基股價平時先至跟啦。
陸羽仁
回應(5) 我想回應
陸羽仁 BLOG 舊文