金融High Tea 2014年6月5日
消息股
2014年06月05日
大市調整，恒指收報23151點，跌139點，成交顯著縮減至482億元，但各類股份炒住不同消息炒上炒落，好多理由聽落好牽強，只係證明咗生意淡薄，不如賭博，實體經濟無乜好講，炒家就搵啲理由造吓嘢，搵番餐晏仔。
濠賭當黑 彩票猛炒
好似近排濠賭股被人係咁沽，沽到昨日，竟然搵到個理由，話世界盃月中開幕影響澳門博彩，大行覺得下月澳門博彩收入仍軟，濠賭股未跌完。銀娛(027) 再挫2%，永利澳門(1128) 跌1%，相關股份大部份都喺低位浮沉。
坦白講，賭世界盃同去澳門搏殺，大家都係博彩，但賭波要有心水，同賭百家樂照計點都唔同啩，何況世界盃四年一次，影響係咪咁大先？
舊年中國大媽湧落嚟買金，好似好好咁，但呢啲因素只有一時影響，今年4月份零售額大跌，成個數咪跌番落嚟！呢啲個別因素本來何足掛齒，濠賭股咁都要跌，只係證明佢哋底子弱啫。
炒家既然借住世界盃理由去質賭股，順手就炒吓內地彩票股。內地市場人士估計，巴西世界盃期間，預計中國互聯網體彩會按年升逾70%，網絡彩票銷量今年或破600億人民幣，彩票股逆市彈出。
傳獲騰訊(700) 入主的華彩(1371) ，全日抽升17%，匯銀家電(1280) 仲升咗19%，其他好多彩票股都升咗7、8%。
6月份賭博氣氛濃，股民猛搵消息炒作，一隻好能夠滿足佢哋嘅股，係經營阿信屋的CEC國際(759) ，昨日又傳佢開雲吞麵店，股價再飆8%，收報3.21元。收市後董事會發聲明，話經合理查詢後，確認並不知悉導致價格及成交量波動的任何原因。
CEC近排可以話係消息股，前兩日有人就話，世界盃嚟啦，阿信屋零食業務可以受惠，搞到佢當日股價爆上近一成兼成交大增，家話賣雲吞麵，一個消息令公司市值再增差不多兩億，如果一間無物業嘅雲吞麵店值200萬，呢個估值應該唔算低，都要佢開100間，先頂得住昨日佢股價嘅升幅，咁究竟佢家開咗幾多間雲吞麵？佢開店又係咪賺梗先？
睇番往績，CEC大股東林偉駿係一位橋王，當日佢開阿信屋，以被大型超市迫害的姿態出現，透過供應商唔畀貨玩殘佢，搞到有正義化身的報紙幫佢大版大版報道，做晒免費宣傳，點知調轉頭佢響完朵就大灑金錢，喺領匯同好多地方搶貴舖，開了以百計的門市，究竟做零食店係咪咁好賺就唔知，但股價就被人炒咗一浸。
阿信屋母企再爆上
今年，電訊魔童搞免費電視搞到起起地泡，想話搞網購博一舖。網購人人話做，但係咪咁易做得掂呢？不過唔緊要，又有說法話CEC可能會同佢合作。
林偉駿係橋王，王維基又係橋王，橋橋結合，聽落都引來無限憧憬，好多老散喺街見到周圍都係阿信屋，又見到橋王大聯盟，即時就諗起「花旗股俠」彼德． 林治話，喺行超市呢啲日常生活，只要用心觀察，就可以發展到好投資，咁今次仲唔係天賜靈感？加上係傳媒日日見到相關消息，仲唔係發揮「投資就是生活、生活就是投資」呢個賺錢哲學嘅時候？
好多成功嘅企業家嘅信念，係只要有夢想，凡事可成真，陸羽仁最佩服係呢啲創業者。不過，作為投資者唔係自己做生意，所以寧願實際啲，相信十個散戶有九個半睇錯，既然自己無喺呢啲股賺過錢，就寧願繼續睇吓熱鬧，好過家走去落疊啦！
陸羽仁
金融High Tea 舊文