金融High Tea 2014年6月12日
點講都死
2014年06月12日
五、六月港股一反跌市常態，指數居高不落，呢段亦係考膽色的日子，美股日日創新高，但買家開始有啲卻步，搞到成交減少，跟炒港股的投資者，一樣驚個市會掉頭，大家都唔敢大力掃貨，喺杜指挑戰17000點關口之際，賺咗錢的投資者，都開始減啲磅，令港股跟升之勢窒窒哋。
騰訊要唱獨腳戲
港股昨日收報23257點，跌58點；國企指數收報10508點，跌10點，成交減至525億元，小跌市成交縮，反映拋售力量唔係咁大，只係無乜人買嘢啫，說明大家喺呢個時間都唔想加注，呢啲市況揸𨋢大戶小小錢已可以為所欲為，對佢哋最為有利。淡市搵嘢炒下，借住有消息話港交所(388) 完成「滬港通」內部測試，AH折讓大的股份熱炒。洛陽玻璃(1108) 勁升咗17%；昆明機床(300) 大漲11%；重慶鋼鐵(1053) 抽升13%。「滬港通」仲有段時間先落實，所以呢類概念炒得嚟會好飄忽。
唔好睇個市雖然調整咗幾十點，個別累升得多的股票都回吐唔少，只因為隻騰訊(700) 升番咁上下，指數睇落就無點郁，陸羽仁話呢個時候想追貨要小心諗清楚，睇嚟無乜點錯。
阿里話咗去美國後，喺香港動作都少埋，得番騰訊喺度做騷。市傳騰訊入股星美文化(2366) ，刺激星美文化股價爆升，並於下午停牌，股價於停牌前報1.05元，升咗57%，為升幅最大港股。
星美文化母公司星美集團午後發出聲明，指目前沒有出售旗下任何資產的意向，同時沒有與騰訊有接觸，現時一切經營活動正常。騰訊股價就維持近日強勢，漲2.9元，報收116.4元。
化妝品股歐舒丹(973) 去年純利減少27%，股價昨日再跌3%。佢主要產銷天然和有機成份生產化妝品，主要市場有中國、日本、俄羅斯等。
集團過去側重日本，過去一年處境頗為艱難，受匯兌虧損大增及成本增加影響，盈利大減。陸羽仁睇到公司亞太區常務董事被記者追問削減自由行有無影響，呢位老外嘅語言藝術聽到人想笑。
老外董事話公司主要以本地客為主，但又話自由行係香港第二大客源，若然削減自由行客，啲客或者喺番當地買產品囉，相信對公司無乜影響。
眾所周知，內地人嚟香港買化妝品，係貪無關稅賣得平啲，同埋有質素保證，如果喺內地買，產品貴咗，自然買少啲，否則外國品牌點肯俾貴租係香港開店？
削自由行恐嚟料
老外董事唔想講到自由行有影響，一個可能係唔想畀人感覺前景不明朗，呢個都係好多零售業老闆嘅心態，自由行太多惹起市民反感，商家唔想做衰人，希望政府頂住壓力，結果搞出本地派甚至驅蝗聲音，政府話要大減自由行兩成，咁就輪到商界頭痕，你話影響大就係怕未反對成功股價已碌低，若然唔出聲，又怕政府真係嚟料，總之講又死、唔講又死。
以歐舒丹為例，公司業績唔好，受主要市場日本匯價弱的不利因素影響。最近日本加銷售稅，可能成為第二波衝擊，若然再話減吓自由行客，豈非雪上加霜，打多兩捶？睇番佢一年股價最高去過23.2元，昨日收17.3元，家已經跌咗唔少，但佢市盈率仲有26.6倍，計起嚟仲唔算平，喺咁環境下，唔通管理層仲出嚟嗌救命，話自由行會搞到佢咩？呢個情況喺其他零售股身上都可能出現，由於自由行睇嚟只係大削抑或小削，受政策影響就難免嘞！
陸羽仁
金融High Tea 舊文