魚樂無窮：熱錢又殺到有乜好買
■黃銳林任主席的包浩斯現價市盈率僅7.7倍，較同業平均折讓逾三成。資料圖片
金管局年半以來首次向市場注資，執筆之時共沽出約163億港元。以往注資不外乎因為熱錢湧港掃股樓，2009年起嘅樓市大升浪，正正由熱錢掀起。不過今次就有唔同嘅演繹︰金管局話近日部份企業派息，加上併購活動增加，令港元需求增加；又有陰謀論指大鱷瞄準本港政府不穩，挾高港股再沽空，等食大茶飯。誰是誰非暫時未知，但市場反應相當正面，恒指埋單升358點，創今年新高之餘，主板成交超越700億銀，乃久違了嘅大成交升市。現階段買乜股好？大價股港交所(388)及騰訊(700)都係唔錯嘅選擇。前者在港股轉活下，加上滬港通開波在即，必有一番作為；後者乃最正宗阿里巴巴影子股，現價較歷史新高僅差半成，喺炒影子股炒龍頭嘅概念下，破頂不是夢。
包浩斯睇升三成
個股則可吼實包浩斯(483)，公司剛公佈全年業績，盈利按年上升26%，喺零售股寒冬下，依然錄得增長，值得畀like。包浩斯現價市盈率僅7.7倍，比起同業如I.T(999)及佐丹奴(709)平均11.6倍，折讓超過三成，又勝一仗。最近股壇長毛David Webb增持股權至7.2%，有明星效應，可加分！唔貪心，用10倍市盈率做目標，睇3.47元，潛在升幅三成，屆時仲有4.5厘息打底。
七一後記︰雖然由進場到出發，喺維園等咗四個鐘，期間日曬雨淋、風吹雨打，但51萬名市民追求民主自由普選的熱誠，卻從未動搖，五個字︰香港人好嘢！
唐牛
https://www.facebook.com/tongcow88
唐牛
魚樂無窮 - 唐牛 舊文