中環在線：鏞記第三代新店開張
葉澍堃胡定旭挽鵝硬銷
■四位食家主動叫師傅畀幾隻燒鵝佢哋拎住俾人影相，唔怕整汙糟自己套衫，跟主人家真係老友。林靜攝
中環鏞記第三代另起爐灶，已故第二代掌舵人甘健成二子甘崇轅喺灣仔開嘅「甘牌燒鵝」、長子甘崇軒喺北角開嘅「甘飯館」噚日先後開張。甘牌燒鵝更獲政商界「食家」畀面捧場，前高官葉澍堃、醫管局前主席胡定旭同立法會議員林健鋒一人一句硬銷力讚，認真夠朋友。
■甘氏兩兄弟搵人畫一幅四代同堂嘅畫放喺灣仔新店，畫中有已故爺爺、即鏞記創辦人甘穗煇同埋爸爸甘健成，佢哋亦跟畫拍照留念。黃偉傑攝 
■食家唯靈(右)以前經常同已故甘健成把酒談歡，專誠嚟撐世姪。 
■有新食店開張，又點少得資深食評家蔡瀾來捧場。 林健鋒蛇王去食鵝
甘牌燒鵝下晝兩點開張，四點半輪到甘飯館，甘老太、甘健成太太、甘崇軒兩兄弟同甘崇轅一對仔女都到齊兩間店嘅開張儀式，四代同堂，連埋一眾親友、熟客，逼爆兩間舖。甘崇轅同時將甘牌燒鵝門店入面一幅甘家四代同堂嘅畫作揭開，話想食店有多啲家庭溫暖感覺。
講番三位一睇身形就知道佢哋係「食家」嘅嘉賓。中午喺立法會要求放飯、驚住張華峰餓到腳軟嘅林健鋒，兩點幾出現喺甘牌食燒鵝、乳豬，但就冇帶埋張華峰，只係跟其他嘉賓爭住認係熟客。
林健鋒話鏞記三代人嘅手勢都試過，跟手仲細數鏞記歷史，話鏞記以前由邊度搬去邊度雲雲；旁邊嘅葉澍堃不甘示弱，話自己由20歲食到60歲，仲次次都有左髀食，跟甘健成仲曾經係乒乓雙打戰友；60歲嘅胡定旭就話食咗30幾年。
試完燒鵝、乳豬，三位又爭住賣口乖，林健鋒話食過翻尋味，胡定旭指平時自己唔食鵝皮，但噚日都食曬。最有心思似乎都係葉澍堃，話「有甘健成先生嘅味道」，不過都唔及資深電視人蔡和平一句「鏞記水平都唔夠佢哋好」直接。
李華華
mailto:LiWaWa@AppleDaily.com
【學界佔中黃竹坑現場】YouTube重溫：
http://bit.ly/71march
LiWaWa@AppleDaily.com
中環在線 - 李華華 舊文