金融High Tea 2014年7月15日
小心摑兩巴
2014年07月15日
喺外面資金流入下，外匯基金結算持續增加，總數將會打破二千億元，喺呢個消息下再加上內地股市向好，恒指今個星期開市造好。中環茶友焦點仲係究竟外面啲錢不斷流入香港做乜？
過去，外面有錢嚟，港股自然好，但今次情況唔係太明顯，個市喺資金流入消息曝光後爆上，但跟住無以為繼，上周末又爆番落去。有茶友笑言，大戶出得嚟行，照計無理由咁易捉路，俾你睇到佢入嚟買股，任你搵食啩，所以就算佢哋係睇好滬港陸，準備調錢入嚟玩，可能都會扯上扯落，好友、淡友都殺一番先喎，喺咁嘅情況下，急追者隨時就畀人摑兩巴，比較穩陣都係揀啲自己有信心嘅股票，低先買吓，高就唔好心急撈貨。
中行補鑊 股價回穩
港股昨日表現唔錯，開市已經造好，之後升幅擴大至226點，高見23459點。惟大市未能企穩十天線，午後內地股市回升，港股保持升勢，恒指收報23346點，升113點；國企指數收報10457點，升78點，成交477億元。
大市仍以中資股表現較好，內地三大電訊商成立鐵塔公司，中移動(941) 、聯通(762) 及中電信(728) 將分別持有鐵塔公司40%、30.1%及29.9%股權，三大電訊股齊升。中移動報78.55元，勁升1.95元或2.55%，可以話好耐無咁威過；聯通是藍籌升幅最大股份，全日揚0.58元，造12.86元；中電信跑贏一眾國企指數成份股，股價彈0.15元或3.85%，造4.05元。中國通信服務(552) 指在電訊商在同等條件下會優先考慮中通服，股價炒高8%，收報3.92元。上個星期被央視點名踢爆跨國匯款業務有逃匯漏洞的中行(3988) ，假期間全力補鑊，發表多宗消息澄清，最新訊息似乎係銀行喺灰色地帶操作，衝擊暫時無原先估計咁勁，內銀股股價普遍偏穩番。
另外，AH折讓股再有炒作，新華製藥(719) 飆15%，洛陽鉬業(3993) 等都升創一年新高，炒呢啲股要眼明手快，要炒就要知自己做緊乜，同埋比較穩陣做法，都係搵番啲業績唔差嘅股份作目標。
個市呢排似乎炒番多啲內地因素，所以後向要睇吓內地股市仲有乜消息。A股昨日造好，主要係傳將公佈國企改革試點名單，兩項改革各有兩間企業，令市場添憧憬。中國證監會表示推動擴大QFII和RQFII的規模，引入更多長期資金；並取消審批重大資產收購案，預計將掀起併購潮，內地兩市以近全日高位收市，上證指數收報2066點，升19點；深成指報7278點，升71點。
瑞銀指撤限購作用不大
過往喺升市多數會炒吓的內房股，但內房仲係呆呆哋。瑞銀首席中國經濟學家汪濤表示，這一輪房地產下跌並非由政策觸發，而是因為市場供求失衡，加上與其他資產相比，房地產作為投資產品的吸引力正在下降，取消限購措施作用不大。
她認為，政府對房地產政策仍較謹慎，特別是針對全面放鬆限購及全面放鬆首付比例等政策。
另一方面，隨着理財產品及貨幣基金等金融產品發展，相信很多三、四線城市房價上升步伐放緩，甚至停止，降低市場投資房地產的意欲。如果佢嘅講法無錯，咁即係放寬政策都未必有用，內房股有排都未有條件大好。
陸羽仁
金融High Tea 舊文