金融High Tea 2014年8月12日
衝關
2014年08月12日
美股上周五大反彈，港股回升是預期之內，結果恒指回升超過三百點，力水算係唔弱，期指就做緊低水。恒指兩萬五千點係三年高位，心理阻力唔小，衝上去可能要試多幾次先成功都唔奇。
兩萬五點阻力唔細
升市當中，強勢的港交所(388) 曾見180元，全日升2.5元，報179.2元；另一有好表現的是周三公佈中期業績的騰訊(700) ，收造132.3元，升2.5元。在騰訊帶動下，手遊股乘勢殺上。中期虧轉盈賺3294萬美元的IGG(8002) 大升近三成，收報5.47元，升1.25元；連帶博雅(434) 飆10.5%，收報10.06元；雲遊(484) 彈5%，造19.18元。
大市能夠高收，除咗外圍反彈，中國上月通脹率只有2.3%，反映經濟平穩發展，滬深兩市飆高逾1%都有幫助。恒指下午升穿十天線，午後最多飆340點高見24671點，最終全日挨近高位收市，收報24646點，上升314點；國企指數收報11037點，上升205點，但成交由上周五的719億元，再減至僅657億元，顯示資金仲係觀望階段，始終兩萬五千點嘅阻力唔細。
港股能否挑戰三年高位向上衝，幾睇內地股市表現。據內地媒體報道，國際資金加速經過港股流入A股，中國股票基金的淨流入額創2008年來新高。呢排個市憧憬滬港通全天候測試今日啟動，證券股及內銀股本周開市又全線炒上，主導大市升勢。
另一方面，7月CPI及PPI按年分別上升2.3%及下跌0.9%，均符合市場預期，亦對股市有支持作用，睇嚟內地個市氣氛仍然保持住。
萬洲創掛牌後新高
市場搵股炒，國企炒作概念之一係引入民企的股權改革，早前中央公佈咗一批名單，但最先吹出呢個想法嘅中石化(386) 就榜上無名。事後有說法話「三桶油」在國企中地位獨特，中央唔想輕舉妄動，所以無將佢哋擺落名單咁話。
雖然名落孫山，但母公司中國石化集團董事長傅成玉對改革就興致勃勃，繼續自己諗計出招，集團就透露上周四(7日)他在總部會見騰訊總裁劉熾平一行，雙方就相互合作等話題進行了交流。
市場最近已流傳，話中石化想開始搞網上賣油，之前有媒體報道中石化仲想出售下游銷售公司30%的股份，日前已經開始了第一輪投標。參加拍賣商估計將超過20家，包括互聯網兩大巨頭騰訊和阿里巴巴。有說中石化高層對於引進民企態度保留，最感興趣者主要係董事長傅成玉，所以聽起來有小小上面熱、中間冷的感覺。
三桶油係老大企業，山頭多唔在講，傅成玉喺中海油搞得唔錯，調到中石化想有一番作為，面對唔同嘅環境，佢自然想借力打力，搞出一番新景象。今次再傳會見騰訊高層，可能又會引起相關聯想。
半新股萬洲國際(288) 掛牌遇跌市，但都頂住個價，趁個市反彈，佢昨日大升近5%，創咗6.97的掛牌新高價，而且成交有13億元。
以佢市值算係大型股份，股價打咗一輪椿後破頂，成為近期表現比較好的新股，如果有貨無沽，可以訂好止賺位睇多陣。
今日掛牌的內地華東地區豪華汽車經銷商潤東汽車(1365) ，在暗盤市場未錄成交。該股以下限3.58元定價，由於招股不足額認購，首掛表現似乎寄望唔高。
陸羽仁
金融High Tea 舊文