陸羽仁 BLOG 2014年9月23日
富豪揸現金
2014/9/23 上午 09:32:30
網誌分類: 經濟
中國經濟弱成為美股下跌因素，杜指昨日跌107點。近期中國資料疲弱，許多分析師下調了對中國的經濟預估，但中國財長樓繼偉話，不會因為單個經濟指標的變化而做大的政策調整，令此前憧憬阿爺可能出台強勁刺激經濟政策的投資者即時榭曬。
亞洲股市先冷一冷，歐美股市亦打個乞嚏。美國小型股及納指首當其衝，明顯腳軟，羅素2000指數及納指分別挫1.4%及1.1%，杜指則挫0.6%。
另外，美股真係屋漏更兼逢夜雨，屋漏係美元強勢持續，美元指數已經連續 10個星期走高，創了自1973 年成立指數以來最長漲勢，令到用美元計價的大宗商品股及海外收入佔比偏高的跨國企業股大受打擊。例如有64%營收來自海外的油股巨企艾克森美孚，便是明顯受拖累，過去10星期，儘管美股整體走高，但股價卻下跌了5%。美國本土收入佔艾克森美孚整體營收 36%，其餘來自海外。艾克森美孚昨日跌0.6%，另一家國際業務更多的重型機器商Caterpillar仲傷，7月中至昨日收市，股價已經累跌超過一成！昨日跌1.6%，係表現第二差嘅杜指成份股。美元強令呢啲公司蝕匯水都蝕死，美元強，海外收入馬上縮水。
當然美元轉強，對經濟也不是完全是壞事，變相降低產品入口價，用美元計價的原油也隨著美元上升而下跌，由6月底的每桶104美元，跌至昨日近90美元。油價下跌超過一成！消費者慳了油錢，又有利其他支出，幫助內需零售與經濟成長。
至於另一場夜雨，就係差過預期嘅美國經濟狀況，昨日出爐嘅房地產市道以至整體嘅經濟活動都有放慢的跡象。費城聯儲報告稱，美國8月經濟活動指數從7月份的0.26下降至-0.21，三個月的平均水準從0.2下降至0.07；而同期的二手房銷售量減少1.8%，年化數字降至505萬幢，差過市場預期的520萬幢，更係5個月以來首次下滑。地產股指數昨日便大跌2%，跑輸大市。房屋建造股跌幅顯著D. R. Horton跌2.6%，Beazer Homes跌2.8%，Toll Brothers 大跌3.1%，報32.41美元。
在內外夾擊之下，美股昨日走勢肉酸，由開市跌至收市。杜指收跌107點，報17199點；標普500指數跌18點至1993點，納指跌63點，報4516點，跌幅為1.4%。
講開地產投資，據Weatth-X及瑞銀對全球億萬富豪的調查顯示，全世界的億萬富豪平均每人手持6億美元現金，比較去年，呢個金額較去增多了6千萬美元，手持現金佔總持產的價值的平均比例為19%。另一份報告更指出，千萬以及百萬富豪亦手持巨額現金，比例甚至更高，平均由20%至30%不等。分析家指超級富豪寧願持有多些現金，都唔做投資，反映他們對入市十分謹慎，正在等待較好的時刻才出手投資。比較他們所持有房地產的投資，平均為1.6億美元，遠比持有現金的比例為低，大約只有五份之一。換言之，超級富豪唔係咁睇好地產前景。
瑞銀財富管理的首席投資主管Simon Smiles(呢個姓幾棧鬼)表示，許多億萬富豪的問題都係，如何運用手上的現金？ Smiles解釋，富人手持現金，主要原因係2008至2009年期間的全球金融海嘯以及歐洲的債務危機所帶給他的痛苦陰影，仍然殘留不去。令到他們覺得持有現金會比較安全，做成資產組合的現金比例特別高。他的們的心態已經不是要求每項投資的資產都有回報，只要所有資產加埋一齊，能夠有回報，已經心足。
Smiles指出，好多富人特別係美國的富人都好痛苦，由於所有的資產價格這幾年一路上漲，而他們投資在股票，以至全面的資產投資的比例都偏低，所以食唔到呢個上升浪。時至今日，所有資產都已經好貴，他們在情緒上更加唔想投資，所以現金就愈揸愈多。富豪都唔係蠢人，他們要保存財產，呢個行為值得研究。
陸羽仁
回應(11) 我想回應
陸羽仁 BLOG 舊文