金融High Tea 2014年9月23日
內房靚股等平買
2014年09月23日
美股收市創新高，但未阻止大戶屠牛行動。港股美國預託證券全面下跌，返到香港開市已經低插，跟住內地股市走跌，加上又有內房股宣佈供股，搞到內房板塊腳仔軟，結果出現美股升、港股跌的掃興場景。借住內地股市重創，上證指數急吐1.70%，觸發港股再跌，淡友即劏40隻恒指牛證。
港股連續下跌後失守兩萬四千點大關，尾市貼近全日低位收市。恒指收報23955點，跌350點；國企指數收報10597點，跌186點，成交金額723.5億元。藍籌股僅得三隻股份上升，餘下大部份恒指成份股走軟。
科網股出現反高潮
內地經濟成為造淡理由，加上本周有12隻新股申購，估計凍結資金或多於6000億元人民幣。另外，首八個月，國有企業利潤總額按年增長8%，出現放緩，搞到內地股市變咗軟腳蟹。今日匯豐中國製造業採購經理人指數(PMI)數據，若低過50的盛衰分界線，港股調整或會加深，下試23700點，如果數字靚仔啲，唔排除會出現反彈，但要記住嘅係，蘋果新手機上市同阿里巴巴掛牌兩大利好消息都已經見晒光，暫時難以寄予厚望對股市再帶來刺激。
阿里巴巴上周五首日美國掛牌大升38%，未有帶旺本港上市同業，科網股一如我所料出現反高潮，騰訊(700) 大跌逾3%，造121.1元；IGG(8002) 急挫6.42%，收報4.37元。
持有阿里巴巴股份的中國動向(3818) 仲衰，瀉咗12.7%，收造1.51元，咁睇阿里股價喺美國又威得幾耐呢？
市場昨日焦點係雅居樂地產(3383) 。內房股近日陸續有抽水行動，今次雅居樂宣佈以大折讓供股，計劃以五供一方式，按每股4元，發行6.96億股，集資27.85億元，供股比上周五日收市價5.81元折讓約31.15%，股份開市就被拋售，最終收報5.39元，急挫7.23%。
其他龍頭內房股都走軟，萬科(2202) 雖獲瑞信上調評級至「跑贏大市」，股價仍要微跌0.28%，報14.02元；中國海外(688) 跌多少少，唔見咗1.90%，報20.7元，融創中國(1918) 則挫3.43%，造5.63元。
每年的9至10月，係內房股賣樓的高峰期，有「金九銀十」之稱，但今年「金九」開局麻麻，主要係內地買家對樓價下跌形成心理預期，單靠撤消限購等行政指令，暫時未能扭轉市場氣氛，加上有官員講到明，唔會因為個別經濟現象改變調整政策，醒目的內房商自己執生。
「金九銀十」兜貨唔使急
家見到集資嘅內房股好多都係主打二線城市，由於市道放緩同埋去貨減慢主要係實力次一級的地區，喺區內有項目發展而又上咗市嘅公司，自不然盡早吸定水，以備不時之需。
有同內房老闆相熟嘅富豪同陸羽仁講，如果你有留意，早前晉身咗千億俱樂部嘅恒大(3333) ，開始又話搞瓶裝水，又話進軍消費市場，背後反映咗老闆覺得有多元化經營的逼切性。
恒大老闆市場觸覺好靈敏，佢猛咁增加其他收入渠道，會唔會係佢覺得內房轉型同調整都要一段相當長的時間，所以及早改變策略，避免過份倚賴一個市場呢？
如果呢個推測無錯，相信好多內房老闆都會做定長期抗戰準備，咁印股票換銀紙必然係其中一個策略，將來好似雅居樂咁大折讓集資的例子仲會出現，所以就算想買內房股，都唔使咁急兜貨，因為未來好大機會仲有好多又正又平嘅內房股票賣！
陸羽仁
金融High Tea 舊文