陸羽仁 BLOG 2014年9月29日
亂局 冷靜
2014/9/29 上午 09:14:21
網誌分類: 經濟
佔中示威者不退，金融區交通半癱，股市照開。網上流傳阿爺會救市的消息，大家可以當笑話睇，千祈咪信。
雖然我估政治事件對股市無持久影響，但短期必會令投資者審慎，好難好樂觀，面對這種市況，先宜冷靜，不要急於行動，見急跌唔好追沽，見急升唔好撲入，睇定啲為尚。
美股上周四大插之後，翌日大幅反彈，雖然未完全收復上日的所有失地，但標普500指數及納指企番上50天移動平均線之上，杜指的17000點大關亦失而復得。杜指上周五收市升167點至17113點，標普500指數漲17點，收報1983點；納指收漲45點，造4512點。美股近期的波幅有擴大跡象，但跌多升少，有級級向下的味道。總結上星期，杜指跌1%，標普500指數跌1.4%，納指挫1.5%，係八周以來最差表現。
美股上周四大跌後有買盤撈底，估計係睇到上周五美國公布的經濟數據相當不俗，美國第二季度GDP增幅年化數字終值增長4.6%，高過此前公佈的增長4.2%，初值更只係有4%。呢份數據係美國自從全球金嘯海嘯以來的最好表現。市場估計第三季度表現也會不錯，迄今所披露的製造業、貿易和住房等數據都顯示狀況仍然良好。雖然未必會好過第二季，但唔會弱，市場預期第三季度會增長3.6%。此外，密执安大學/路透社在周五公布，美國9月消費者信心指數終值為84.6，係2013年7月以來新高，略高過市場預期的84.3，而上月為82.5。
美股近期波動有擴大的跡象。市場有唔少聲音覺得呢個係唔係資金撤走的先美兆，尤其美元持續轉強，聯儲局加息時間可能提早，世紀最大的新股阿里巴巴上市之後，大市通常「見好就收」。我都覺得美股近期有些變味，不過斷估又未有咁快會死，特別係經濟有見底回升跡象，更重要嘅係導致美股近期腳軟軟的俄羅斯烏克蘭緊張關係有緩和跡象。投資者對地緣政治局勢無咁緊張，股市又有番啲支撐。
據紐約時報報道，正值歐美同俄國因為烏克蘭問題玩緊經濟制裁戰，歐洲能源部同俄羅斯上周五在德國柏林共同簽訂了天然氣供應合約，俄羅斯天然氣巨頭Gazprom同意於今個冬天(今年10月至明年3月)供應烏克蘭最少50億立方米嘅天然氣，售價為每千立方米385美元，附帶條件係烏克蘭在年底前分兩期償還31億美元債務予俄羅斯。由於此前的天然氣付款問題出現糾紛，Gazprom在今個夏天停止供應烏克蘭天然氣，當地天寒地凍，冬天無天然氣供熱，真係死得人多。該合約還要經烏克蘭政府同意，如果事成的話，烏克蘭與俄羅斯又會有番起碼6個月嘅和平日子好過，美股—可以得到一定程度嘅支撐。
至於港股，唔計佔中，美股未來有較好表現，10月有滬港通，港股10月後本來可能會有番啲反彈，而家要睇睇佔中搞成點。另外，即使有反彈都唔係轉勢，有重貨在手，不妨趁反彈減少些貨，留多啲彈藥等低位再入。
陸羽仁
回應(4) 我想回應
陸羽仁 BLOG 舊文