金融High Tea 2014年9月29日
轉勢
2014年09月29日
佔中提早開鑼，搞到施放催淚彈，政局並不平靜，市面上各種謠言滿天飛，本來都不想再轉述，但亦深怕股民受誤導，所以都想講吓。
一則流傳最廣的短訊話，「美國CIA要大量沽空期指配合佔中，中央政府亦準備反擊，大量掃入港股，估計港股將反彈回升至3萬點左右。要做大富翁要看準機會上車啦。」
今日期指結算，唔知係唔係有人揸咗期指輸到眼坦坦，所以作出這等消息。不過發放此消息的人士，小心被控「操控市場」。
托市消息唔好信
此短訊十足似係流料，原因有三。第一美國政府已和內地傾好，支持「袋住先」，暫時唔似由佢哋帶頭玩嘢。第二阿爺不喜歡佔中，若然佔中令股市大跌，股民覺得好痛，正中阿爺下懷，無必要推高港股。第三，講到上3萬點咁具體，你估貼文者係習主席咩，連目標點數都知？若然佢咁堅唔使傳短訊益大家，自己撲入去買期指做大富翁都得啦，自己發達使鬼益你咩。結論係呢啲托市消息「流到極」，唔好信。
早兩個月前寫過吓佔中，話擔心有少少機會玩大咗，變成黑天鵝事件，家前景未知，政治混亂對股市不是好事。除此之外，仲要擔心個市本身已經轉咗勢。
9月快將完結，港股味道已經轉差。外圍美股上周初段仍然相當OK，內地股市亦在救市傳聞之中，升到今年高位。而港股既跟不上美股，亦無被A股帶動，腳軟軟，恒指反覆向下，跌穿24000點。上周四美股杜指大跌264點，翌日港股狀況還可以，唔係跌好多。不過，睇港股弱勢已經形成，上周五跌得比美股少，只係之前跌得快過人而已。
港元轉弱要留神
不知大家是否還記得，我幾個星期前講過，美元轉強，係股市走勢逆轉的訊號。先前港元在上周三尚在低位7.7512，接着急抽而上，兩日之內，到上周五抽高到7.7576收市。大家都知，港元強代表資金流入，港元弱代表資金流失，家資金正流出香港，股市都有壓力。
大家睇番港股轉弱，以及美股的變化，與美元、美息的走勢，有很大關係。美股今年有超級巨企阿里巴巴上市，美股這個派對算係開得唔錯啦。然而，無論幾happy嘅派對，都總有散band玩完的時候。如果美股今年派對行將落幕，是伴隨着美元及美息的上升，對港股的毒害將會更大。
有朋友話，港元同美元掛鈎，美元轉強，按理資金不會從香港撤走。我話此言差矣。由於資金主要來自美國，流入包括香港及其他新興市場的渠道，主要係透過互惠基金流入，當互惠基金投資者意識到美元轉強，美息向上，就會贖回對新興市場基金的投資，將資金調回投資於美國本土市場的基金，甚至只是暫存現金，意圖分享美元上升的好處。這種贖回資金、重新投資的行為，將對整片市場都有影響，資金從亞洲市場上抽走，港股同被波及，港元匯價轉弱正反映這種抽資走勢。
如果論港股的短期走勢，由於近期回得比較多，可能會有反彈。恒指從25300點以上的高位碌下來，已經跌咗千幾點。9月期指結算後，10月中段有滬港通，將是一個港股反彈的很好藉口。不過，我擔心下月即使港股好轉，也只是一個反彈，反彈幅度也未必會太大。港股想重上上次高位，難度相當高。就算係上番24500至24800點這些高位，也不是話去就去，要有相當多的利好消息支持。
反彈要等滬港通
固然，港股反彈幾多，要視乎滬港通效應有幾熱，其次睇美股有幾熱。我覺得即使滬港通熱度比較高，最多只能去番24800點，估計未到25000點，已經行人止步。大家數數手指，今年有阿里巴巴上市、有蘋果推出iPhone 6，這些都是利好消息，而且也一一兌現了。當好消息兌現以後，上升動力便會消化。我叫大家留意的滬港通，同樣是利好消息，當利好消息實現見光，散戶入市炒作的時候，也就是大戶派最後一轉貨，散水走人的時候。所以，如果手上持貨多的話，我覺得10月大市反彈，反而係一個減些持貨的好機會，最好係設定目標，分段減持。
你或許會問，如何判斷是增持還是減持呢？我覺得關鍵是要先判斷大市的大趨勢、大方向，要估量是否有大牛市在滬港通來臨時殺到。如果是大牛市的話，你減持的話，自然會錯過一浪又一浪的升幅。但如果滬港通力度未夠改變港股上落市之勢的話，在相對高位減持絕對不壞，若手上貨多錢少，減持是在累積資本，待大市在今年底明年初有較大回落的時候，有更多彈藥在低位吸貨。
斷估無痛苦，港股大市已經呈現反覆向下的走勢。原因有兩個，第一係宏觀面，美元強、利息向上，對股市係壞消息，要到壞消息兌現，市場消化以後，狀況才會好轉。這要看聯儲局幾時宣佈加息，佢宣佈加息才是壞消息曝光的時候。
貨多反彈可減持
第二係港股之前的上升浪，力度不足。恒指今年高見25300幾點，雖然已升穿了過去這幾年的高位，但只係微穿，如恒指此前能夠升上26000點，甚至27000點，會令投資者對大市有更強信心。恒指上到25000多一點的幾年高位，只係掂一掂，就落番嚟，而且落得比較急速，顯示港股仍未擺脫上落市的格局，估計滬港通推出後港股可以超愈高位的機會不算太大。市場之前的走勢可以幫助大家判斷其後趨勢。如果之前的一浪有力，往後的浪，可能會更加有力。如果之前的浪乏力，你也不要對嚟緊嘅浪期望太高。千萬不要過份自信，以為自己一定估得啱，要不斷從市場搜集資料，修正自己的估計，預測可能會準確少少。
現時港股許多股份都相當弱，例如去年的熱炒股、科網股等，而濠賭股更不用提，今年升得急的地產股，都回得好快。出現這種狀況，大家更加要小心，因為顯示資金正從市場撤出。光看指數不夠，要看上升股份多還是下跌的股份多，因為幾隻大股跌得不多，指數回落有限，但其實很多股票都已跌好多，大市的味道已轉壞。
上周五美股大反彈，若然今天不是期指結算，個市或會好啲，期指結算就難估啲。過完結算後，只要佔中爆唔到大鑊，10月後這兩個星期，斷估港股會有些反彈，但這不是飛身撲入的機會，反而是減持獲利的窗口。
陸羽仁
金融High Tea 舊文