金融High Tea 2014年9月16日
下插劏牛
2014年09月16日
聯儲局本周議息，投資者擔心提早加息，觸發港股七連跌，恒生指數全日收報24356點，跌238點；國企指數收報10834點，跌179點，成交微增至666億元。個市喺過千億元大成交下衝破兩萬五千點之後無力再上，家回番落嚟，大戶索性下插殺一殺喺低位累積的牛派好倉。
美債息上得急
呢浸殺牛行動，主力係炒美國加息同強美元。上星期美國債息上得頗快，搞到個市氣氛轉咗一轉，由於美國議息，大市已經跌咗咁多，短期走勢要睇番華爾街點走，但呢個時候走去追沽，風險當然會大咗啦。
個股方面，有報道指阿里巴巴調高招股價範圍上限至70美元以上，推動「死對頭」騰訊(700) 昨日逆市上升，收報123.4元，漲0.4元。中石化(386) 敲定引入25名投資者，為國企引入民營資本開先例。25名投資者包括中國人壽(2628) 、騰訊名下基金及復星國際(656) 等，共認購中石化銷售公司近三成股權，涉資1071億元人民幣。
好消息得到落實，但中石化喺跌市下變咗表現最曳藍籌股，收報7.25元，挫6.76%。若論走勢佢唔靚仔，短期可能再回深少少，但有貨在手不用太急走，之後有機會好番。
另外，新鴻基公司(086) 公佈，配股集資9.96億元，每股作價6.3元，折讓約8.6%，結果昨日跌穿配股價，收報6.1元，急瀉11.47%。
喺跌市中，個別板塊弱勢都幾明顯。昨日我講過股市寵兒係不斷轉移，去年係濠賭股，今年就輪到國企股。
濠賭股從高位回落，股民如果無留意佢轉咗勢，走去執平貨，咁就變成執咗火棒啦，好似喺跌市之中，幾隻龍頭賭股都創出一年低位，如銀河娛樂(027) ，昨日隨大市向下，收報52.3元，跌1.8元或3.33%；澳博(880) 亦跌0.38元或2.10%，造17.68元，兩者均創下52周低位。即係話過去一年買咗濠賭股嘅股民都變成輸家，大市雖然調整咗，但仲係高過低位成4000點，所以買咗濠賭股者都幾蝕章㗎。
由年頭開始，陸羽仁已經多次叫大家留意濠賭股轉勢，最先一次係傳出賭牌續約可能會縮減年期，跟住慢慢又傳出中央關注好多內地高官去澳門耍樂，會收緊監管，跟住就見到澳門博彩數字出現回落，股價拾級而下。
雖然濠賭股大圍環境逐步轉弱，但佢股價唔係跌得咁快，當陸羽仁提出警示後，佢哋股價仲係跌吓彈吓，到呢兩個月先至落得快啲。呢啲係典型大戶出貨嘅手法。大戶買股唔係一萬幾千股，講緊係球球聲，所以佢哋就算睇淡，都唔可能一日清貨，只能沽吓托吓、托吓沽吓，散戶不知就裏，見佢跌吓彈吓，好多人買嚟博反彈，咁佢就可以慢慢散貨，睇嚟濠賭股都有小小呢種情況。
濠賭股未撈得
中環茶友問，大戶又沽又托，咁陸Sir點知佢哋會唔掂呢？其他股價唔好講，濠賭股透明度就最高，澳門旅遊博彩數字個個月都公佈。
去年由於數字個個月高增長，股價次次借勢炒上。今年基數高之餘，加上中央睇到個數字咁樣爆上，不免會以有形之手調控，於是由個個月發博彩收入增長好消息，變咗個個月發博彩收入回落，咁股價照計都好難炒喎，大戶都明白呢個道理，所以持有金沙中國(1928) 大批股份嘅基金，都喺走勢暴露前大手沽貨走人。
至於濠賭股走勢會點，初步睇可以話弱勢已成。首先，睇澳門博彩數字個勢，喺高基數效應下，應該仲會係利淡多過利好；再者，由於大戶已經離場，貨源唔再係咁歸邊，要大幅炒上唔係咁容易，故此暫時仲未到低撈貨嘅時機囉。
陸羽仁
金融High Tea 舊文