魚樂無窮：金蝶食正雲端大茶飯
講今日推介前，先跟進一下第三及第四季重心推介︰億和(838)經過一輪收集後，近日終重上兩蚊大關，日線圖兜緊靚圓底，一旦突破2.14元，又係海闊天空格。CW Group(1322)一棍破頂，成交四個月高，近日不停見有大手上板，不排除有好消息跟尾，3元目標已到，難得成交轉旺，順勢將目標價調高至3.5元。
科網股再度起飛，歸納市場消息，主要原因有三個︰一、美國科網股大彈，二、中信21(241)改名，三、雲計算國際標準正式發佈。橫睇豎睇，頭兩個原因好虛無，第三個原因最實在最有睇頭，更帶挈主攻雲計算業務?金蝶(268)炒高7%，好戲在後頭。
金蝶主攻中小企管理軟件業務，近年成功開拓雲端業務，企業用戶接近200萬戶。阿爺為互聯網維穩，陸續禁用Windows及IBM伺服器，變相為國產軟件開闢新財路。
盈利大爆發要買
金蝶亦不負眾望，近期成功泊到浪潮集團呢個大碼頭，強強聯手食雲端業務大茶飯，成功升呢後，日後生意肯定不愁。最新中期業績，盈利爆升8.4倍至8,146萬人仔，相當於上年度盈利?逾六成，配合新業務發展，今年發盈喜絕不出奇。
彭博綜合券商預測，金蝶預測市盈率21倍，較過去三年平均?37倍大折讓43%，平到笑！睇圖表，金蝶剛突破起自3月?下降軌，第一個反彈目標先睇3蚊，潛在升幅21%，屆時市盈率都只係25倍。
唐牛
https://www.facebook.com/tongcow88
唐牛
魚樂無窮 - 唐牛 舊文